وزیرِ اعظم عمران خان نے کہا ہے کہ حکومت سپیشل اکنامک زونر میں برآمداتی صنعت میں سرمایہ کاری کے فروغ کیلئے اقدامات اٹھا رہی ہے۔

تفصیلات کے مطابق وزیرِ اعظم عمران خان کی زیرِ صدارت اجلاس ہوا جس میں سی پیک کے تحت برآمداتی صنعتوں میں بیرونی سرمایہ کاری کا جائزہ لیا گیا۔

اجلاس میں سرمایہ کاری بورڈ کی جانب سے سپیشل اکنامک زونز میں برآمداتی صنعتوں  کے قیام کیلئے بنائی گئی جامع حکمتِ عملی پر بریفنگ دی گئی۔

اس موقع پر وزیراعظم کو چین میں مختلف شعبوں سے متعلق ممکنہ بیرونی سرمایہ کاروں کی نشاندہی اور پاکستان میں براہِ راست سرمایہ کاری کیلئے فراہم کی جانے والی مراعات کے بارے میں بتایا گیا جبکہ پاکستان میں تین بڑی بین الاقوامی موبائل کمپنیوں کے اسمبلی یونٹس کے قیام اور انکے مقامی کھپت اور برآمدات پر مثبت اثرات سے بھی آگاہ کیا گیا

سی پیک اتھارٹی، وزارتِ صنعت و پیداوار اور سرمایہ کاری بورڈ کی طرف سے  اٹھائے گئے اقدامات پر بریفنگ دیتے ہوئے کہا گیا کہ سی پیک کی رفتار پر مثبت اثرات مرتب ہو رہے ہیں

بریفنگ دیتے ہوئے کہا گیا کہ سی پیک کے تحت آنے والے چینی اہلکاروں کے ویزہ کے مسائل مکمل طور پر حل کر دیئے گئے ہیں، وزارتِ داخلہ روزانہ کی بنیاد پر نئے آنے والے کیسس کو نبٹا رہی ہے۔

اجلاس کی صدارت کرتے ہوئے وزیراعظم عمران خان نے سی پیک کی بروقت تکمیل کو حکومت کی اولین ترجیحات میں سے ایک قرار دیا۔

عمران خان نے کہا کہ حکومت سپیشل اکنامک زونر میں برآمداتی صنعت میں سرمایہ کاری کے فروغ کیلئے اقدامات اٹھا رہی ہے۔

وزیراعظم عمران خان نے مزید کہا کہ برآمداتی صنعتیں روزگار کی فراہمی، معاشی حجم میں اضافہ اور قیمتی زرِ مبادلہ کے ساتھ ساتھ عالمی منڈیوں میں “میڈ ان پاکستان” برآنڈ کی رسائی کو یقینی بنائیں گی۔

اجلاس میں فاقی وزراء شوکت فیاض ترین، شاہ محمود قریشی، شیخ رشید احمد، اسد عمر ، مخدوم خسرو بختیار، علی زیدی، مشیرِ تجارت و سرمایہ کاری عبدالرزاق داؤد ، معاونینِ خصوصی وقار مسعود، معید یوسف, چیئرمین سی پیک اتھارٹی لیفٹینینٹ جنرل (ر) عاصم سلیم باجوہ اور دیگر حکام ہوئے جبکہ اجلاس میں گورنر اسٹیٹ بنک رضا باقر نے وڈیو لنک کے ذریعے شرکت کی۔