صوبائی وزیر اسماعیل راہو نے کہا کہ کراچی میں نہ صرف سندھ بلکہ پورے پاکستان سے افسران تعینات ہیں۔

تفصیلات کے مطابق صوبائی وزیر اسماعیل راہو نے ایم کیو ایم رہنما خواجہ اظہار کے بیان پر ردعمل دیتے ہوئے کہا کہ خواجہ اظہار کا بیان انتہائی افسوسناک اور قابل مذمت ہے۔

انہوں نے کہا کہ متحدہ اب بھی سوچ کے اسی خول میں ہے جہاں انہیں الطاف حسین نے بند کیا تھا، ایم کیو ایم جب تک تعصب کی سیاست سے باہر نہیں نکلتی تب تک شکست خوردہ ہی رہے گی، سندھ کے افسران کو جاہل کہنے سے پہلے اپنے گریبان میں جھانک لیں، فقط سندھ کے افسران کو نہیں بلکہ پورے سندھ کو جاہل اور غیرمقامی کہا گیا ہے۔

اسماعیل راہو نے کہا کہ ایم کیو ایم اور اتحادیوں کے تمام بیان اور بھاشن فقط پی پی پی اور سندھ حکومت پر ہوتے ہیں، کراچی سمیت سندھ کا کوئی بھی مسئلہ ہو تو اسلام آباد میں انکی بولتی بند ہوتی ہے۔

صوبائی وزیر نے کہا کہ یہ ان ہی جاہلوں کا سندھ تھا جس نے سب سے پہلے پاکستان کی قرارداد منظور کی، یہ انہی جاہلوں کی پرامن اور سرسبز و شاداب سندھ تھا، جس کی کشش مہاجرین کو کھینچ کر لائی ورنہ باقی تین صوبے بھی تو پاکستان کے تھے۔

اسماعیل راہو نے خواجہ اظہار کو جواب دیتے ہوئے کہا کہ تعصب کی عینک اتاریں اور پیار، محبت اور امن کی عینک پہن لیں، تو تمام افسر آپ کو پاکستانی نظر آئیں گے۔