برطانوی وزیر اعظم بورس جانسن نے کورونا وائرس سے متعلق تمام پابندیاں ختم کرنے کا اعلان کردیا ہے۔

تفصیلات کے مطابق برطانوی وزیر اعظم بورس جانسن نے لندن میں پریس کانفرنس کرتے ہوئے کہا کہ لوگوں کو کورونا وائرس سے محفوظ رہنے کے لئے اب خود ہی فیصلےکرنا ہوں گے۔

بورس جانسن نے کہا کہ 19 جولائی سے پبلک ٹرانسپورٹ اور دکانوں میں لازمی ماسک پہننے کی پابندی ختم کردی گئی ہے، اس کے بعد ماسک رضا کارانہ طور پر پہنا جاسکے گا۔

برطانوی وزیر اعظم نے یہ بھی کہا کہ کورونا وائرس کے دنوں کی ایک میٹر کی سماجی دوری کی شرط بھی ختم کی جارہی ہے جبکہ سیلف آئیسولیشن برقرار رہے گی۔

بورس جانسن کا کہنا تھا کہ کورونا ویکسینیشن کے مثبت نتائج کے سبب پابندی اٹھانا ممکن ہوا ہے۔ ریسٹورنٹ ، پب میں کیو آر کوڈ سائن اِن کرنے کی شرط اور گھروں میں صرف 6 افراد کی ملاقات کی پابندی بھی ختم کردی گئی ہے۔

برطانوی وزیر اعظم بورس جانسن کا مزید کہنا تھا کہ ہمیں کوویڈ کے ساتھ جینا سیکھنا ہوگا۔29 جولائی تک ملک کی تمام بالغ آبادی کو پہلی ڈوز، دو تہائی کو دوسری ڈوز بھی لگادی جائے گی۔