اسلام آباد پولیس کی جانب سے عیدالاضحیٰ کا سکیورٹی پلان جاری کردیا گیا ہے۔

تفصیلات کے مطابق ضلع بھر میں 3 کھلے مقامات سمیت چھوٹی بڑی 966 مساجد اور امام بارگاہوں پر نماز عید ادا کی جائے گی جبکہ تمام مساجد اور امام بارگاہوں کے فول پروف سیکورٹی انتظامات مکمل کر لیے گئے ہیں۔

جانوروں کی خرید و فروخت کے لیے لگائی جانے والی مویشی منڈیوں کے  بھی سیکورٹی انتظامات کیے گئے ہیں ، ضلع بھر میں  4 ایس پیز، 12 ڈی ایس پیز، اے ایس پیز سمیت 2400 سے زائد پولیس افسران و ملازمان ڈیوٹی سر انجام دیں گے۔

ایس ایس پی اسلام آباد کا کہنا ہے کہ  شہریوں کی جان و مال کی حفاظت اولین ترجیحات ہیں ،  عید کی چھٹیاں پر اپنے آبائی گاؤں جانے والے شہریوں کے گھروں کی حفاظت کو یقینی بنایا جائے گا۔

واضح رہے کہ تمام تر سیکورٹی انتظامات کی نگرانی ایس ایس پی آپریشنز کریں گے۔