صدر مملکت ڈاکٹرعارف علوی نے کہا ہے کہ ملکی معاشی ترقی کیلئے نوجوانوں کو آئی ٹی کے شعبے میں ہنر سکھانے کی ضرورت ہے۔

تفصیلات کے مطابق صدر مملکت ڈاکٹر عارف علوی نے اسلام آباد میں نمل یونیورسٹی کا دورہ کیا جہاں نمل یونیورسٹی کے میجر جنرل (ر) محمد جعفر نے ڈاکٹر عارف علوی کو بریفنگ دیتے ہوئے کہا کہ نمل یونیورسٹی میں 22 ہزار سے زائد طلباء زیرِ تعلیم ہیں جبکہ 77 ہزار فارغ التحصیل ہو چکے ہیں۔

جنرل (ر) محمد جعفر نے بریفنگ میں یہ بھی کہا کہ خصوصی افراد سمیت طلباء کو اس مالی سال میں 34 کروڑ روپے کے وظائف دیئے گئے ہیں۔

صدر مملکت ڈاکٹرعارف علوی کا کہنا تھا کہ جامعات آن لائن تعلیم کی مقدار بڑھائیں، تحقیق اور جدت پر توجہ دیں، جامعات مستقبل کی ضروریات کے مطابق طلباء کو تیار کرنے کیلئے اپنے وژن کو ڈھالیں۔

ڈاکٹرعارف علوی نے کہا کہ اعلیٰ تعلیمی ادارے 21 ویں صدی کی ضروریات کے مطابق اعلیٰ فکری صلاحیتوں کے حامل طلباء تیار کریں۔

صدر مملکت ڈاکٹرعارف علوی نے ملک میں تعلیم کے فروغ کیلئے نمل یونیورسٹی کے کردار کو سراہا۔