صوبائی وزیرِ اطلاعات و محنت سعید غنی نے کہا ہے کہ محمد علی شاہ کے انتقال سے ہم ایک مخلص اورعوام دوست انسان سے محروم ہوگئے ہیں۔

تفصیلات کے مطابق سعید غنی ابراہیم حیدری میں فشر فوک فورم کے چیئرمین محمد علی شاہ کی رہائش گاہ پہنچ گئے جہاں انہوں نے مرحوم محمد علی شاہ کے انتقال پر ان کے اہلخانہ سے تعزیت کی اور فاتحہ خوانی بھی کی۔

سعید غنی نے کہا کہ مرحوم محمد علی شاہ کی ماہی گیروں کے لئے خدمات کو کبھی فراموش نہیں کیا جاسکتا انہوں نے ہمیشہ غریبوں، محنت کشوں اور بالخصوص ماہی گیروں کے حقوق کے لئے ہر فورم پر آواز بلند کی۔

صوبائی وزیرِ اطلاعات و محنت سندھ سعید غنی کا کہنا تھا کہ اللہ تعالیٰ مرحوم کو اپنی جوار رحمت میں اعلیٰ مقام عطا فرمائے، مرحوم کی مغفرت فرمائے اور لواحقین کو صبرِ جمیل عطا فرمائے۔

واضح رہے اس موقع پر صوبائی وزیر کے ہمراہ ارکان قومی اسمبلی عبدالقادر پٹیل، آغا رفیع اللہ، وزیراعلیٰ سندھ کے معاون خصوصی سلمان عبداللہ مراد، عدیل اختر اور دیگر بھی موجود تھے۔