روزمرہ کی بھاگتی دوڑتی زندگی میں ہم اپنی صحت کے متعلق بہت ساری باتوں کو نظر انداز کردیتے ہیں جو کہ یقیناً غلط ہے، کسی بھی فرد کو اپنی صحت کے حوالے سے کسی طور پر غافل نہیں رہنا چاہیے۔

کمر کا درد دنیا بھر کا مسئلہ ہے اور لگ بھگ ہر کسی کو زندگی میں کبھی نہ کبھی اس کا سامنا ہوتا ہے۔

عام طور پر یہ درد پسلی سے نیچے شروع ہوتا ہے اور نیچے تک پھیلتا ہوا محسوس ہوتا ہے جو کہ کافی تکلیف دہ ہوتا ہے۔

 خواتین اورمردوں کے کمر میں درد کی بڑی وجہ اونچی ایڑیوں والے جوتے بھی ہو سکتے ہیں۔

یہ بھی ممکن ہے کہ جو سینڈل یا جوتے آپ پہن رہے ہیں ان کی ایڑیاں بظاہر ٹھیک لگ رہی ہوں لیکن ان کی غیرہمواری سے آپ کے کمر میں درد ہوتا ہو۔

اس حوالے سے طبی ماہرین کا کہنا ہےکہ جب اونچی ایڑی والے جوتے پہنیں جائیں تو کمر کا سارا زور اوپر سے نیچے کی جانب سرایت کرتا ہے جس کے باعث کمرے کی ہڈی اور پٹھے مسلسل دباؤ کی زد میں ہوتے ہیں۔

یوں تو اونچی ایڑی والے جوتے پہننے سے گریز کریں لیکن آپ نے پہننے کا فیصلہ ہی کرلیا تو اپنے سینے کو تھوڑا باہر نکال کر چلیں اس طرح نصف دباؤ تقسیم ہو کر گھٹنے پر منتقل ہوجائےگا۔

ہمارا بستر یقیناً راحت اور سکون پہنچانے کا بہترین ذریعہ ہے لیکن خیال رہے کہ اگر آپ کے استعمال میں غیرمعیاری میٹرس (گدے) ہے تو درحقیقت آپ اپنی کمرے کے لیے متعدد مسائل کو دعوت دے رہے ہیں۔

ایسا اکثر دیکھنے میں آیا ہے جو لوگ سخت میٹرس کا استعمال کرتے ہیں انہیں نرم میٹرس پر راحت محسوس نہیں ہوتی۔

ماہرین کے مطابق جو لوگ درمیانی درجے (یعنی زیادہ سخت اور نہ ہی زیادہ نرم) کا میٹرس اپنے سکون کے لیے استعمال کرتے ہیں وہ کمر کے درد سے بہت حد تک دور رہتے ہیں۔

اس لیے ضروری ہے کہ آپ اپنے زیر استعمال میٹرس کا جائزہ لیں۔

کمر جھکا کر بیٹھنا کمر درد کو بدتر بناتا ہے خاص طور پر اگر کمپیوٹر استعمال کرتے ہیں تو کی بورڈ کی جانب جھکنے سے گریز کریں اور بالکل سیدھا بیٹھیں جبکہ کندھوں کو پرسکون رکھیں۔

سڈنی یونیورسٹی کی تحقیق میں بتایا گیا ہے کہ جو لوگ مختلف قسم کی ورزشوں کے عادی ہوتے ہیں ان میں سے ایک سال کے اندر کمر درد کی شکایت میں 35 فیصد تک کمی آجاتی ہے۔

اسی طرح جو مریض ورزش کے ساتھ ساتھ بھاری چیزوں کو اٹھانے اور بیٹھنے کے مناسب طریقے کو اپناتے ہیں، ان میں اس درد کا خطرہ 45 فیصد تک کم ہوجاتا ہے۔

جب کمر میں درد ہو تو سونا مشکل ہوجاتا ہے، مگر اکثر یہ کمر درد ناکافی نیند کی وجہ سے بدتر ہوتا ہے۔

آپ کے سونے کا خراب انداز کمردرد کو بڑھا دیتا ہے، اگر آپ اکثر کمردرد کا شکار رہتے ہیں تو پہلو کے بل لیٹنے کی کوشش کریں، آپ گھٹنے کے درمیان تکیہ رکھ لیں تاکہ ریڑھ کی ہڈی قدرتی پوزیشن میں رہے اور کمر کو دباﺅ سے ریلیف ملے۔