بالی ووڈ کے اداکار انیل کپور کی بیٹی اور سونم کپور کی بہن پروڈیوسر ریحا کپور شادی کے بندھن میں بندھ گئیں۔

غیر ملکی خبر رساں ادارے کے مطابق ریحا کپور اپنے دیرینہ دوست کرن بولانی کے ساتھ شادی کے بندھن میں بندھ گئیں۔

شادی انیل کپور کے جوہو والے بنگلے میں ہوئی جس میں گھر کے افراد کے علاوہ دولہا اور دلہن کے دوستوں نے شرکت کی۔

کپور خاندان کی جانب سے فی الحال شادی کی تصاویر میڈیا پر شیئر نہیں کی گئیں تاہم  صحافیوں کی جانب سے لی گئیں ریحا کپور کی رخصتی کے وقت کے مناظر کی تصاویر اور ویڈیوز سوشل میڈیا پر گردش کررہی ہیں۔

انیل کپور نے اپنے گھر کے باہر موجود میڈیا شخصیات میں مٹھائی تقسیم کی۔

اس موقع پر انیل کپور نیوی بلیو رنگ کے کرتے اور سفید دھوتی میں نظرآئے۔

سونم کپور نے اپنی بہن کی شادی پر ہلکا سبز اور سنہرا لباس زیب تن کیا اس لباس میں سونم بے حد خوبصورت لگ رہی تھیں۔

اس تقریب میں سونم کپور کے شوہر آنند آہوجا بھی شادی میں موجود تھے۔

ریحاکپور کی شادی میں کپور خاندان کے دیگر افراد نے بھی شرکت کی جن میں ارجن کپور، خوشی کپور، شنایا کپور، انشولا کپور، بونی کپور، سنجے کپور اور ماہیپ کپور و دیگر شامل ہیں۔

واضح رہے ریحاکپور اور کرن بولانی گزشتہ 13 برسوں سے ایک دوسرے کے ساتھ ہیں۔ ریحاکپور پروڈیوسر اور کرن بولانی  فلمساز ہیں اور وہ فلم ’’عائشہ‘‘ اور ’’ویک اپ سڈ‘‘ میں بطور معاون کام کرچکے ہیں۔