وزیر خارجہ شاہ محمود قریشی نے بھارتی انسانی حقوق کی خلاف ورزیوں پر شدید مذمت کی ہے۔

تفصیلات کے مطابق وزیر خارجہ مخدوم شاہ محمود قریشی نے برطانوی دورے کے دوران پاکستان ہاؤس لندن میں کشمیر سے تعلق رکھنے والے نامور برطانوی پاکستانی رہنماؤں اور کمیونٹی کے نمائندوں سے ملاقات کی۔

اس دوران وزیر خارجہ نے مقبوضہ کشمیر میں بھارتی انسانی حقوق کی خلاف ورزیوں کو اجاگر کرنے میں پاکستانی کشمیری برادری کے مثبت کردار کی تعریف کی اور انہیں حکومتِ پاکستان کی جانب سے کشمیر کاز کو آگے بڑھانے کیلئے کیے گئے اقدامات سے آگاہ کیا۔

وزیر خارجہ مخدوم شاہ محمود قریشی کا کہنا تھا کہ حکومتِ پاکستان نے معتبر بین الاقوامی ذرائع پر انحصار کرتے ہوئے حال ہی میں ایک ڈوزیئر اقوام متحدہ میں پیش کیا جس میں بھارتی قابض افواج کے تین ہزار سے زائد جنگی جرائم کی تفصیل بیان کی گئیں۔

وزیر خارجہ قریشی کا برطانوی پارلیمنٹ میں مقبوضہ کشمیر پر حالیہ مباحثے کی تعریف کرتے ہوئے کہنا تھا کہ ایک بار پھر بھارتی قابض فوج کے مظالم اور انسانی حقوق کی خلاف ورزیوں کا پردہ چاک کیا گیا۔

انہوں نے برطانوی پاکستانی کمیونٹی کی حوصلہ افزائی کی کہ وہ مقبوضہ کشمیر میں جاری انسانی حقوق کی خلاف ورزیوں کو منظر عام پر لانے میں اپنا کردار ادا کرتے رہیں۔

وزیر خارجہ مخدوم شاہ محمود قریشی نے کشمیری قیادت کو یقین دلایا کہ پاکستان کشمیریوں کو اقوام متحدہ کی سلامتی کونسل کی قراردادوں کے مطابق حق خودارادیت کے حصول تک ان کی  مکمل سیاسی، اخلاقی اور سفارتی حمایت جاری رکھے گا۔