حیدرآباد میں چہلم امام حسین علیہ السلام کا مرکزی جلوس کربلا دادن شاہ امام بارگاہ پہنچ کر اختتام پذیر ہوگیا ہے۔

تفصیلات کے مطابق حیدرآباد میں چہلم امام حسین علیہ السلام کا مرکزی جلوس انجمن امامیہ کے زیرِ اہتمام قدم گاہ مولا علی سے برآمد ہوا تھا جو کربلا دادن شاہ امام بارگاہ پہنچ کر اختتام پذیر ہوگیا۔

ذرائع کا کہنا ہے کہ حیدرآباد میں موبائل سروس مکمل طور پر بحال کردی گئی ہے۔

واضح رہے کہ کراچی میں مرکزی جلوس اپنے مقررہ راستوں سے ہوتا ہوا حسینہ ایرانیہ پر اختتام پزیر ہوا، جلوس کے راستوں پر پولیس اور رینجرز کی بھاری نفری موجود تھی۔

دوسری جانب کوئٹہ میں بھی چہلم امام حسینؑ انتہائی عقیدت و احترام سے منایا گیا ہے، علمدار روڈ سے برآمد ہونے والے الم، تعزیئے اور شبیہ ذوالجناح کے 22 ماتمی جلوس روایتی راستوں پر رواں دواں تھے۔

ذرائع کا کہنا ہے کہ ماتمی جلوس علمدار روڈ، تاج محمد روڈ، طوغی روڈ، سردار عیسی خان روڈ سے ہوتا ہوا واپس یزدان خان روڈ پر اختتام پذیر ہوا۔

ذرائع کے مطابق چہلم کا پہلا جلوس بہشت زینب قبرستان پر اختتام پذیر ہوا جبکہ دوسرا جلوس علی آباد روڈ اور جرنل موسی روڈ سے ہوتے ہوئے ہزارہ قبرستان پر اختتام پذیر ہوا۔

ذرائع کا کہنا ہے کہ کوئٹہ میں چہلم کے ہزارہ ٹاون سے برآمد ہونے والے جلوس بھی اپنی روایتی راستوں پر رواں دواں ہونے کے بعد اختتام پزیر ہوگئے۔

یاد رہے کہ لاہور میں چہلم امام حسینؑ کا جلوس روایتی راستوں پر رواں دواں تھا، عزداران حسینؑ نے بڑی تعداد جلوس میں شریک کی، جلوس الف شاہ حویلی سے صبح برآمد ہوا تھا اور عزاداران نے کشمیری بازار میں نمازِ ظہر ادا کی تھی۔

ذرائع کا کہنا ہے کہ جلوس رنگ محل چوک سے بھاٹی گیٹ کی طرف گامزن ہوا تھا، جلوس کے راستوں میں عزادارن کی جانب سے لنگر و نیاز کا اہتمام بھی کیا گیا تھا۔

 ذرائع کے مطابق جلوس روایتی راستوں سے ہوتا ہوا امام بارگاہ  کربلا گامے شاہ پر اختتام پزیر ہوا، جلوس کے راستوں پر سکیورٹی کے سخت انتظامات تھے، جلوس کے راستوں پر اسنائپرز تعینات تھے، اسنفگ ڈوگز اور بم ڈسپوزل اسکواڈ کے زریعے چیکنگ کی جارہی تھی۔