ترجمان پاک بحریہ کا کہنا ہے کہ تیسرا چیف آف دی نیول اسٹاف ہاکی ٹورنامنٹ 2021 اختتام پذیر ہوگیا ہے۔

تفصیلات کے مطابق ترجمان پاک بحریہ نے اپنے جاری کردہ ایک بیان میں کہا کہ پاک بحریہ کی ٹیم نے ٹورنامنٹ میں تیسری پوزیشن حاصل کی، ٹورنامنٹ کے فائنل میچ میں نیشنل بینک آف پاکستان نے واپڈا کو 1 کے مقابلے میں 2 گول سے شکست دی۔

ترجمان پاک بحریہ کے مطابق چیف آف دی نیول اسٹاف ایڈمرل محمد امجد خان نیازی ٹورنامنٹ کی اختتامی تقریب کے مہمانِ خصوصی تھے، نیول چیف نے فاتح اور رنر اپ ٹیموں میں تمغے اور انعامات تقسیم کئے۔

ترجمان پاک بحریہ کا کہنا ہے کہ امیر البحر نے قومی کھیل کے فروغ کے لئے پاک بحریہ، پاکستان ہاکی فیڈریشن اور اسپانسرز کی کاوشوں کو سراہا، نیول چیف محمد امجد خان نیازی نے امید ظاہر کی کہ دیگر ادارے بھی قومی کھیل کے فروغ اور تجدید کے لئے اپنا کردار ادا کریں گے۔

ترجمان پاک بحریہ کے مطابق نیشنل بینک کی ٹیم بطور فاتح 1.7 ملین روپے کے انعام کی حقدار قرار پائی، دوسری اور تیسری پوزیشن حاصل کرنے والی ٹیموں کو 1.3 اور 1 ملین کی انعامی رقم دی گئی۔

ترجمان پاک بحریہ کا کہنا تھا کہ نیشنل بینک کی ٹیم کے کھلاڑی دلبر نے مین آف دی ٹورنامنٹ کا اعزاز حاصل کیا۔