وفاقی وزیراسدعمر کا کہنا ہےکہ جب تک ویکسی نیشن کا ہدف پورا نہیں ہوگا بندشوں کا سامنا رہےگا۔

 تفصیلات کے مطابق اسلام آباد میں سربراہ این سی او سی اسد عمر اور وزیراعظم کے معاون خصوصی برائے صحت ڈاکٹرفیصل سلطان نے مشترکہ نیوزکانفرنس کر تے ہوئے کہ ویکسی نیشن کی بنیاد پر8 شہروں میں پابندیوں میں نرمی کر دی گئی ہے، کوئٹہ ،پشاور ،اسلام آباد ،پنڈی ،میرپور، مظفرآباد، گلگت اور اسکردوان شہروں میں شامل ہیں۔

اسد عمر نے کہاکہ ان 8 شہروں میں انڈور اجتماعات میں 300لوگوں کو شرکت کی اجازت ہوگی، جبکہ آؤٹ ڈور اجتماعات میں ایک ہزارلوگوں کو شرکت کی اجازت ہوگی۔

سربراہ این سی او سی نے کہاکہ یکم اکتوبر سے8 شہروں میں مزارات مکمل طور پر کھولے جارہے ہیں۔

انہوں نے کہاکہ ان 8 شہروں میں ویکسین لگوانے والوں کیلئے سینما ہالزکھول رہےہیں، ان شہروں میں شادی ہالز7 روزکھولنے کی اجازت ہوگی۔

سربراہ این سی اوسی نے کہاکہ ان 8 شہروں میں یکم اکتوبرسےتمام ریسٹورنٹس 7 روزکھلے رہیں گے، یکم اکتوبر سے ائیرلائنزمیں مسافروں کو کھانا فراہم کیا جائے گا۔

وفاقی وزیر نے کہاکہ 40 فیصد سےکم ویکسی نیشن والےعلاقوں میں بندشیں لگائی جائیں گی، باقی شہروں میں پابندیاں 15 اکتوبر تک برقرار رہیں گی۔

 اسدعمر نے کہاکہ جب تک ویکسی نیشن کا ہدف پورا نہیں ہوگا بندشوں کا سامنا رہےگا، کورونا سے نکلنے کا واحد راستہ زیادہ سے زیادہ ویکسی نیشن ہے۔

نیوز کانفرنس میں موجود وزیراعظم کے معاون خصوصی برائے صحت ڈاکٹرفیصل سلطان نے کہاکہ ویکسین نہ ہونے پرپابندیوں پرانحصارکررہےتھے،اب ہماری حکمت عملی ویکسین پرمنحصرہے۔

ڈاکٹرفیصل سلطان نے کہاکہ 12 سال سے زائد عمر کےبچوں کیلئے ویکسین کی اجازت دیدی، تعلیمی نظام جاری رکھنے کیلئے بچوں کی ویکسی نیشن لازمی ہے۔

وزیراعظم کے معاون خصوصی برائے صحت نے عوام سے اپیل کی کہ ویکسین کےمنفی اثرات نہیں ،افواہوں پرتوجہ نہ دیں۔

دوسری جانب وفاقی وزیر اطلاعات فواد چوہدری نے ٹوئٹر پر جاری ایک پیغام میں کہا ہے کہ امید ہے لاہور اور کراچی کی انتظامیہ ویکسی نیشن ڈرائیو کو بڑھائے گی تاکہ اگلے دس دنوں میں ان شہروں کے سینیما بھی کھل سکیں۔

راولپنڈی اسلام آباد سمیت آٹھ شہروں میں سینیما کھولنے کی اجازت دے دی گئ ہے، امید ہے لاہور اور کراچی کی انتظامیہ ویکسینیشن ڈرائیو کو بڑھائیں گے تاکہ اگلے دس دنوں میں ان شہروں کے سینیما بھی کھل سکیں، ،،۔۔ pic.twitter.com/DprwrYgdLz

— Ch Fawad Hussain (@fawadchaudhry) September 29, 2021

اس سے قبل وفاقی وزیر اطلاعات فواد چوہدری نے کابینہ اجلاس پر میڈیا بریفنگ دیتے ہوئے کہا تھا کہ وفاقی کابینہ کو الیکٹرونک ووٹنگ مشین پر بریفنگ دی گئی ، انتخابات میں شفافیت یقینی بنانا حکومت کی اولین ترجیح ہے۔

انہوں نے کہا تھا کہ پاکستان کی معیشت کا بہت اہم حصہ بیرون ملک مقیم پاکستانی ہیں ، ملک میں انتخابی اصلاحات ضروری ہیں ، وفاقی کابینہ کوای وی ایم اور آئی ووٹنگ پر بریفنگ دی گئی ، ہم نے پرائیویٹ کمپنی سے20ای وی ایم منگوائی ہیں ، وزیراعظم نے ای وی ایم اور آئی ووٹنگ کا معاملہ اپوزیشن سے مل کرحل کرنے کا کہا ہے۔