فیڈرل بورڈ آف ریونیو (ایف بی آر) کے مطابق انکم ٹیکس گوشوارے داخل کرنے کی تاریخ میں توسیع نہیں کی جائے گی۔

تفصیلات کے مطابق فیڈرل بورڈ آف ریونیو (ایف بی آر) کی جانب سے جاری کردہ اعلامیے میں کہا گیا کہ فیڈرل بورڈ آف ریونیو نے انکم ٹیکس گوشوارے داخل کرنے کی تاریخ کے بارے میں ایک مرتبہ پھر واضح کردیا کہ افراد، ایسوسی ایشن آف پرسنز اور کمپنیز کے لئے انکم ٹیکس گوشوارے داخل کرنے کی حتمی تاریخ 30 ستمبر 2021 ہے، ایف بی آر آئرس سسٹم روانی سے چل رہا ہے، 28 ستمبر کو تقریبا 1 لاکھ 50 ہزار گوشوارے داخل کئے گئے ہیں۔

اعلامیے کے مطابق ایک دن میں داخل کئے جانے والے  گوشواروں کی تعداد سب سے زیادہ ہیں، ایف بی آر نے اپنے سسٹم کی استعداد کار میں اضافہ کیا ہے تاکہ ٹیکس گزاران کو بہترین سہولیات فراہم کی جا سکیں، قانونی پیچیدگیوں سے بچنے کے لئے آخری تاریخ ختم ہونے سے قبل اپنے انکم ٹیکس گوشوارے داخل کر لیں۔