پاکستان پیپلزپارٹی (پی پی پی) مہنگائی کے خلاف سڑکوں پر نکل آئی ہے۔

تفصیلات کے مطابق اسلام آباد کے آبپارہ چوک میں پاکستان پیپلزپارٹی  احتجاجی مظاہرہ کررہی ہے، احتجاج میں موجود پیپلزپارٹی کے رہنماء نیئر بخاری نے کہا کہ مہنگائی کے خلاف یہ مہم ملک بھر میں پھیلے گی۔

اسلام آباد کے آبپارہ چوک میں پیپلزپارٹی نے مہنگائی کے خلاف احتجاجی مظاہرہ کیا، مظاہرے میں پاکستان پیپلزپارٹی (پی پی پی) کے کارکنان شریک ہوئے، مظاہرین سے خطاب میں پیپلزپارٹی رہنماء نیئربخاری نے کہا کہ مہنگائی کے خلاف مہم کی بنیاد رکھی ہے اس تحریک کو پورے پاکستان تک لے کرجائیں گے، وزیر اعظم عمران خان نے کہا تھا کہ مہنگائی ہو تو حکمران چور ہوتا ہے اب عمران خان بتائے کہ کون چور ہے؟

احتجاج میں موجود شرکاء کا کہنا تھا کہ روٹی، کپڑا، مکان، پیپلزپارٹی کا نعرہ ہے، مہنگائی کے خلاف جنگ کرنے نکلے ہیں تنخواہ دارطبقہ مہنگائی کی چکی میں پس رہا ہے۔

احتجاج میں مظاہرے کے دوران پولیس کی بھاری نفری کسی بھی ناخوشگوار واقعے سے نمٹنے کیلئے موجود رہی۔

واضح رہے کہ پیپلز پارٹی کے سیکرٹری جنرل سید نیئر حسین بخاری نے مہنگائی کے خلاف سڑکوں پر نکلنے کا اعلان 2 دن پہلے کر دیا تھا، ان کا کہنا تھا کہ ہم مہنگائی کے خلاف اتوار کو آبپارہ چوک اسلام آباد میں شام پانچ بجے احتجاج کریں گے۔

پیپلز پارٹی کے سیکرٹری جنرل سید نیئر حسین بخاری اور دیگر رہنماء کا کہنا تھا کہ احتجاج میں ہم مظاہرین سے خطاب کرینگے، سید سبط الحیدر بخاری کی قیادت میں حکومتی اقدامات مہنگائی اور بڑھتی بے روزگاری کے خلاف احتجاجی ریلی نکالی جائے گی، پیپلز پارٹی اور ملحقہ تنظیموں کے عہدیداران اور کارکنان شریک ہونگے، ریلی میں مہنگائی کے خلاف احتجاجی مظاہرے میں پیپلز پارٹی کے عہدیداران اور کارکنان برطرف ملازمین وکلاء مزدور تاجر سول سوسائٹی کی تنظیمیں شرکت کریں گی۔