وزیراعلیٰ پنجاب سردار عثمان بزدار نے کہا ہے کہ عوام کے مسائل حل کرنے کے لئے ہر ضلع، تحصیل اورعلاقے تک جاؤں گا۔

تفصیلات کے مطابق وزیراعلیٰ پنجاب سردار عثمان بزدار نے اراکین پنجاب اسمبلی ندیم قریشی اور مامون تاڑر سے ملاقات کی جس میں اراکین اسمبلی نے وزیراعلیٰ پنجاب کو اپنے حلقوں کے ترقیاتی منصوبوں پر پیش رفت سے آگاہ کیا۔

وزیراعلیٰ پنجاب سردار عثمان بزدار نے کہا کہ عوامی نمائندوں کی مشاورت سے ترقیاتی منصوبوں کو تکمیل تک پہنچایا جائے گا، ترقیاتی منصوبوں کی تشکیل اور تکمیل میں اراکین اسمبلی کی تجاویز کو اہمیت دی جاتی ہے۔

عثمان بزدار نے کہا کہ ہم پسماندہ اور نظرانداز کردہ علاقوں کے ترقیاتی منصوبوں کی مانیٹرنگ کررہے ہیں، ترقی ہر شہر، قصبے اور دیہات کا حق ہے، عوام کو ان کاحق لوٹا رہے ہیں۔

وزیراعلیٰ پنجاب سردار عثمان بزدار کا کہنا تھا کہ میں ہر ضلع اور شہروں کے دورے کر کے مسائل کا جائزہ لے رہا ہوں، عوام کے مسائل حل کرنے کے لئے ہر ضلع، تحصیل اورعلاقے تک جاؤں گا۔