راولپنڈی سے آرمی اربن سرچ اینڈ ریسکیو ٹیم کوئٹہ روانہ ہو گئی ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق سرچ اینڈ ریسکیو ٹیم کوئٹہ سے آرمی ایوی ایشن ہیلی کاپٹروں کے ذریعے زلزلے سے متاثرہ ہرنائی پہنچے گی۔

آئی ایس پی آر کے مطابق آرمی کی یہ خصوصی ٹیم سرچ اینڈ ریسکیو کوششوں میں معاونت کرے گی۔

واضح رہےکہ بلوچستان کے ضلع ہرنائی میں شدید زلزلے سے ہونے والی تباہی کو ریسکیو کرنے کے لئے سیکیورٹی فورسز کے دستے متاثرہ علاقوں میں پہنچ گئے ہیں۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز کے دستے ہرنائی کے زلزلے سے متاثرہ علاقوں میں پہنچ گئے ہیں۔

آئی ایس پی آر کا کہنا ہے کہ زلزلے سے متاثرہ عوام کے لیے خوراک اور شیلٹر بھی روانہ کیے گئے ہیں۔

آئی ایس پی آر نے ریسکیو آپریشن کے حوالے سے بتایا ہے کہ سیکیورٹی فورسز کے دستے ریلیف اینڈ ریسکیو امدادی سرگرمیوں میں مصروف ہیں جبکہ آرمی ڈاکٹرز اور پیرامیڈیکس ضروری ادویات سمیت طبی امداد کے لیے سول انتظامیہ کی معاونت کر رہے ہیں۔

آئی ایس پی آر نے بتایا ہے کہ 9 شدیدزخمیوں کوپاک فوج کے ہیلی کاپٹر کے ذریعےکوئٹہ پہنچادیا گیا ہے اور امدادی کاموں میں تیزی کیلئے ریسکیو ٹیموں کو راولپنڈی سے روانہ کردیا گیا ہے۔