احتساب عدالت نے سابق وزیراعظم یوسف رضا گیلانی کو طلب کر لیا ہے۔

تفصیلات کے مطابق پاکستان پیپلز پارٹی کے سینئر رہنما اور سابق وزیراعظم یوسف رضا گیلانی کو طلبی کا نوٹس جاری کر دیا گیا ہے۔

ذرائع کے مطابق احتساب عدالت کے جج اعظم خان نے سابق وزیراعظم یوسف رضا گیلانی کے نوٹس جاری کئے ہیں۔

یوسف رضا گیلانی کو 10 نومبر کو احتساب عدالت کے روبرو پیش ہو نے کی ہدایت کی گئی ہے۔

ذرائع کے مطابق پاکستان پیپلز پارٹی کے سینئر رہنما اور سابق وزیراعظم یو سف رضا گیلانی پر یونیورسل سروسز فنڈز کی کروڑوں کی اشتہاری مہم من پسند کمپنی کو نوازنے کا الزام ہے۔

اس کے علاوہ نیب نے ملزمان کے خلاف اختیارات سے تجاوز کرنے کا ریفرنس بھی دائر کر رکھا ہے۔

دوسری جانب پی پی رہنما خورشید شاہ کی جیل سے رہائی ایک دن تاخیر کا شکار ہو گئی ہے۔

 سپریم کورٹ سے جاری آرڈر کی تصدیق نہ ہونے کی وجہ سے رہائی کا معاملہ تاخیر کا شکار ہو گیا ہے۔

ذرائع کے مطابق پاکستان پیپلز پارٹی کے سینئر رہنما خورشید شاہ کے بیٹے زیرک خورشید شاہ نے وکلاء کے ساتھ ایک کروڑ کے ضمانتی مچلکے جمع کرائے ہیں۔

 اس حوالے سے خورشید شاہ کے بیٹے زیرک شاہ کا کہنا ہےکہ احتساب عدالت سکھر میں مچلکے جمع ہونے کے بعد سپریم کورٹ سے آرڈر کی تصدیق ہونی ہے۔

زیرک شاہ نے بتایاکہ آج جمعے کا دن ہونے کی وجہ سے تصدیق نہیں ہوسکی، کل ہفتے کے دن سپریم کورٹ سے آرڈر کی تصدیق ہو جائے گی۔

خورشید شاہ کے بیٹے نے مزید کہاکہ سپریم کورٹ نے کل ایک کروڑ کے مچلکے جمع کرانے پر خورشید شاہ کی درخواست ضمانت منظور کی تھی۔

واضح رہےکہ پاکستان پیپلز پارٹی کے سینئر رہنما خورشید شاہ کے بیٹے زیرک شاہ وکلاء کے ساتھ آج احتساب عدالت سکھر پہنچے تھے۔