ایڈمنسٹریٹر کراچی مرتضیٰ وہاب نے کہا ہے کہ خرم شیر زمان صرف باتیں اور سیاست کرنا جانتے ہیں۔

تفصیلات کے مطابق ایڈمنسٹریٹر کراچی مرتضیٰ وہاب نے سپریم کورٹ کے باہر میڈیا سے گفتگو کرتے ہوئے کہا کہ جو بھی چیز صوبے کے اندر ہوتی ہے وہ سسٹم کے تحت ہوتی ہے، افسران کی تعیناتی اور تبادلے قانون کے مطابق ہوتے ہیں، ڈی جی کی تعیناتی بھی قانون کے تحت ہوئی ہے۔

مرتضیٰ وہاب کا کہنا تھا کہ وفاقی اور صوبائی حکومتیں مل کر ریہابلیٹیشن کا کام کریں گی، وزیر اعلیٰ سندھ سید مراد علی شاہ کی جانب سے 1 ارب روپے منظور کئے گئے ہیں، بحریہ ٹاؤن کے لئے بھی پیسے سندھ حکومت کو ملتے ہیں تو بہتر کام کر کے دکھائیں گے۔

ایڈمنسٹریٹر کراچی مرتضیٰ وہاب نے کہا کہ خرم شیر زمان صرف باتیں اور سیاست کرنا جانتے ہیں، نسلہ ٹاور پر جو عدالت کا فیصلہ آئے گا اس پر عمل کیا جائے گا، ماضی میں یہاں کیا کچھ ہوتا رہا ہے اس پر کچھ کہنا نہیں چاہتا، شہر کو تجاوزات سے صاف کرنے کی ضرورت ہے۔