وزیر مملکت اطلاعات فرخ حبیب نے کہا ہے کہ حکومت عوام کیلئے صاف پانی کی فراہمی اور پارکس پر توجہ دے رہی ہے۔

تفصیلات کے مطابق فیصل آباد میں وزیر مملکت اطلاعات فرخ حبیب نے تقریب سے خطاب کرتے ہوئے کہا کہ علاقے کیلئے ترقیاتی کام  جاری رہیں گے، وزیر اعلیٰ پنجاب سردار عثمان بزدار نے فیصل آباد کیلئے 13 ارب کا پیکج دیا ہے، فیصل آباد کو پارکوں کا شہر بنانا ہے۔

وزیر مملکت فرخ حبیب نے کہا کہ ہر یونین کونسل میں فلٹریشن پلانٹ بھی لگائیں گے، حکومت عوام کیلئے صاف پانی کی فراہمی اور پارکس پر توجہ دے رہی ہے، وزیر اعظم عمران خان دورہ سعودی عرب کے بعد فوڈ سپورٹ پروگرام کا اعلان کریں گے۔

انہوں نے کہا کہ ماضی میں حکمران بیرون ملک گھر بناتے رہے جبکہ وزیر اعظم عمران خان غریبوں کیلئے گھر بنا کے دے رہے ہیں، موجودہ حکومت کسانوں کو ریلیف پہنچانے کیلئے اقدامات کر رہی ہے، وزیر اعظم عمران خان کی قیادت میں ملک کو ترقی کی طرف لےکر جانا ہے، سندھ میں اربوں کی گندم چوہے کھا جاتے ہیں۔

وزیر مملکت اطلاعات فرخ حبیب نے پاکستان اور بھارت کے درمیان ٹی 20 میچ کے حوالے سے کہا کہ آج پوری قوم کی نظریں پاکستان بھارت میچ پر ہیں، پوری قوم گرین شرٹس کی کامیابی کیلئے دعا گو ہے، آج پاکستانی کرکٹ ٹیم جیتے گی، آج بابر اعظم کا بلا بھی چلے گا، قومی ٹیم پاکستان کا نام روشن کرے گی، ٹیم جوش و جذبے سے میدان میں اترے، ٹیم آخری بال تک فائٹ کرے۔

واضح رہے کہ ٹی 20 ورلڈ کپ میں دنیائے کرکٹ کا سب سے بڑا ٹاکرا آج ہونے والا ہے، شائقین کرکٹ کی دل کی دھڑکنیں تیز، جوش وجذبہ اور ولولہ عروج پر ہے۔

آج دبئی کرکٹ اسٹیڈیم میں چوکوں اور چھکوں کی بھرمار ہوگی، شائقین کرکٹ ایک اور اعصاب شکن مقابلہ دیکھنے کو بے قرار ہے۔

پاک بھارت ٹاکرا پاکستانی وقت کے مطابق شام 7 بجے ہوگا۔

ہائی وولٹیج مقابلے کیلئے 12 رکنی قومی ٹیم کا اعلان کردیا گیا ہے، بھارت کیخلاف میچ کیلئے قومی ٹیم کی قیادت بابر اعظم کریں گے۔

محمد رضوان، فخرزمان، حیدر علی، شعیب ملک ، عماد وسیم ، محمد حفیظ ، آصف علی، شاداب خان اور حسن علی ٹیم میں شامل ہیں۔

اس کے ساتھ ساتھ شاہین آفریدی اور حارث رؤف بھی ایکشن میں نظر آئیں گے۔

آج کے میچ کے حوالے سے کپتان بابر اعظم کا کہنا ہے کہ بھارت کا ریکارڈ توڑنے کی کوشش کریں گے۔