صوبائی وزیر صنعت وتجارت میاں اسلم اقبال نے کہا ہے کہ پنجاب حکومت نے صنعتی مراکز کی 100فیصد آباد کاری کی پالیسی اپنائی ہے۔

تفصیلات کے مطابق صوبائی وزیر صنعت وتجارت میاں اسلم اقبال کی زیرصدارت پیسک ہیڈ کوارٹر آفس میں پنجاب اسمال انڈسٹریز کارپوریشن بورڈ کے ممبران کا 117واں اجلاس ہوا جس میں اسمال انڈسٹریل اسٹیٹس کی کالونایزیشن اور پیسک کی جاری اسکیموں پر پیش رفت کا جائزہ لیا گیا۔

میاں اسلم اقبال نے کہا ہے کہ پنجاب روزگار اسکیم کے تحت ہنرمند نوجوانوں کو اپنا روزگار شروع کرنے کے لئے آسان قرضوں کی فراہمی جاری ہے، اسکیم میں تیزی لانے کے لئے قرض حصول کی شرائط کو مزید نرم کیا جارہا ہے۔

انہوں نے کہا کہ دستکاری کے فن کی ترویج اور کاٹیج انڈسٹری کی بحالی کے لئے بھی آسان قرضے دیئے جارہے ہیں، پنجاب اسمال انڈسٹریز کارپوریشن کی کریڈٹ اسکیموں کے تحت گزشتہ تین سالوں میں 45,735 ملین روپے کے قرضے تقسیم کیے گئے ہیں۔

صوبائی وزیر میاں اسلم اقبال نے مزید کہا ہے کہ انڈسٹریل اسٹیٹس میں صنعتی یونٹ لگنے سے روزگار کے نئے مواقع پیدا ہوں گے، پنجاب حکومت نے صنعتی مراکز کی 100فیصد آباد کاری کی پالیسی اپنائی ہے، گجرات اسمال انڈسٹریل اسٹیٹ اور سرجیکل سٹی سیالکوٹ کے قیام پر تیزی سے کام جاری ہے۔

صوبائی وزیر صنعت وتجارت میاں اسلم اقبال نے صنعتی مراکز میں ترقیاتی کاموں کو تیز رفتاری سے مکمل کرنے کی ہدایت دی ہے۔

واضح رہے کہ اجلاس میں ایڈیشنل سیکرٹری صنعت وتجارت، ایم ڈی پیسک، ڈائریکٹر پیسک اور دیگر بورڈ ممبران شریک تھے۔