وزیر زراعت پنجاب سید حسین جہانیاں گردیزی نے کہا ہے کہ صوبہ پنجاب گندم کی قومی پیداوار کا 76فیصد حصہ پیدا کرتا ہے۔

تفصیلات کے مطابق محکمہ زراعت پنجاب اور فاطمہ فرٹیلائزر کے باہمی اشتراک سے زیادہ گندم آگاؤ مہم سیمینار کا ساہیوال میں انعقاد ہوا جس میں عثمان بزدار حکومت کی رواں سیزن بھی گندم کی ریکارڈ پیداوار کے لیے منصوبہ بندی مکمل کی گئی، وزیر زراعت پنجاب سید حسین جہانیاں گردیزی نے بطورِ مہمان خصوصی شرکت کی۔

سیمینار میں ڈی جی زراعت ایکسٹینشن انجم علی بٹر، زراعت افسران ، پی ٹی آئی رہنماؤں اور کاشتکاروں نے کثیر تعداد میں شرکت کی۔

وزیر زراعت پنجاب سید حسین جہانیاں گردیزی نے کہا کہ امسال صوبے میں 1 کروڑ 67 لاکھ ایکڑ پر گندم کی کاشت کا ہدف مقرر کیا گیا ہے، اس سال کل پیداوار 2 کروڑ 20 لاکھ میٹرک ٹن کا ہدف مقرر کیا گیا ہے، 12 ارب 59 کروڑ روپے کی لاگت سے گندم کی فی ایکڑ پیداوار میں اضافے کے قومی منصوبہ پر عملدر آمد جاری ہے۔

سید حسین جہانیاں گردیزی کا کہنا تھا کہ صوبہ پنجاب گندم کی قومی پیداوار کا 76 فیصد حصہ پیدا کرتا ہے، امسال 10 لاکھ ایکڑ سے زائد رقبہ کے لئے گندم کے بیج پر 1200 روپے فی تھیلہ سبسڈی فراہم کی جا رہی ہے، جڑی بوٹی، مار زہروں اور کنگی کے تدارک کے لئے زرعی زہریں سبسڈی پر فراہم کی جا رہی ہیں، کاشتکاروں کو براہ راست سبسڈی کی فراہمی کے لئے کسان کارڈ کا اجراء کیا گیا ہے۔

وزیر زراعت پنجاب سید حسین جہانیاں گردیزی نے کہا کہ دیگر فصلوں کی پیداوار میں اضافے کیلئے بھی کام جاری ہے، اب تک 5 لاکھ سے زائد کاشتکار کسان کارڈ کے لئے رجسٹریشن کرواچکے ہیں، کسان کارڈز کے ذریعے اربوں روپے کی سبسڈی فراہم کی جا رہی ہے، کاشتکاروں کو بینک لونز کی بھی کسان کارڈز کے ذریعے فراہمی کے لئے کام جاری ہے۔

صوبائی وزیر زراعت پنجاب سید حسین جہانیاں گردیزی کی جانب سے کسان کارڑز اور گزشتہ سال گندم پیداواری مقابلے کے ونرز میں شیلڈز بھی تقسیم کی گئی۔