گورنر خیبرپختونخوا شاہ فرمان نے کہا ہے کہ حضور ﷺ کی اطاعت دنیا و آخرت میں ہماری نجات کا باعث ہے۔

تفصیلات کے مطابق گورنر خیبرپختونخوا شاہ فرمان نے میڈیا سے گفتگو کرتے ہوئے کہا ہے کہ عید میلادالنبی ﷺ  پرپوری قوم اور امت مسلمہ کو مبارکباد دیتا ہوں ، اپنے قول و فعل سے دنیا کو دکھانا ہے کہ ہم ایک عظیم پیغمبرکے امتی ہیں۔

انہوں نے کہا کہ حضور ﷺ کی حیات طیبہ نہ صرف مسلمانوں بلکہ پوری انسانیت کی سیرت و کردار کی تعمیر اور اخلاق و اعمال کی درستگی کیلئے عمدہ مثال ہے ، سنت نبوی ﷺ پر عمل پیرا ہوتے ہوئے ہمیں اپنی انفرادی اور اجتماعی زندگیوں میں تبدیلی لاناہوگی۔

گورنر خیبرپختونخوا شاہ فرمان نے کہا ہے کہ نبی کریم ﷺ نے انسانوں کو انسانیت کا احترام اور مساوات و انصاف کا درس دیا ، نبی کریم ﷺ سے محبت ہمارے ایمان کا حصہ ہے۔

 اس سے قبل گورنرخیبرپختونخوا شاہ فرمان کی زیرصدارت زیتون اور بیری کی کاشت سے متعلق جائزہ اجلاس ہوا تھا جس میں زیتون اور بیری کی کاشت کوفروغ دینے سے متعلق اموروتجاویز پرتبادلہ خیال کیا گیا۔

اجلاس میں گورنر نے محکمہ جنگلات اور زراعت کو زیتون کی کاشت کیلئے ضلعی سطح پردرست وتحقیق شدہ ڈیٹا فراہم کرنے جبکہ سرکاری وپرائیویٹ نرسریز سے زیتون کی کاشت کیلئے نرسری اورقلم کاری کیلئے مطلوبہ درست تعداد کی فراہمی کی بھی ہدایت دی تھی۔

گورنرخیبرپختونخوا شاہ فرمان نے اجلاس کی صدارت کرتے ہوئے ہدایت دی تھی کہ زیتون اور بیری کی کاشت کیلئے ہر ضلع سے موزوں میسربنجرزمین کی حقیقی تعداد فراہم کی جائے۔

اس موقع پر گورنرخیبرپختونخوا نے کہا تھا کہ زیتون اور بیری کی کاشت عوامی مفاد کامنصوبہ ہے جس میں کوتاہی کی گنجائش نہیں۔

شاہ فرمان نے یہ بھی کہا تھا کہ موزوں اراضی کے مطابق زیتون کی نرسری لگانے اورقلم کاری کیلئے موثرحکمت عملی ترتیب دی جاسکتی ہے جبکہ زیتون کی نرسری اورقلم کاری زیادہ مقدارمیں درکارہے تاکہ کاشت وسیع رقبہ پرکی جاسکے۔

گورنرخیبرپختونخوا شاہ فرمان نے مزید کہا تھا کہ صوبہ کی زمین زیتون اور بیری کی کاشت کیلئے انتہائی زرخیز ہے جبکہ ایک اندازے کے مطابق صوبہ میں 26 کروڑ زیتون کے پودے لگوائے جاسکتے ہیں۔