وزیر اعلیٰ پنجاب سردار عثمان بزدار نے کہا ہے کہ پنجاب حکومت کمزور طبقوں کی فلاح پر خصو صی توجہ دے رہی ہے۔

تفصیلات کے مطابق وزیر اعلیٰ پنجاب سردار عثمان بزدار سے سیلانی ویلفیئر ٹرسٹ کے بانی مولانا بشیر فاروقی کی قیادت میں وفد نے ملاقات کی، ملاقات میں کمزور طبقات کی فلاح، لنگر خانوں اور پناہ گاہوں کے حوالے سے تبادلہ خیال کیا گیا۔

وزیر اعلیٰ پنجاب سردار عثمان بزدار کا کہنا تھا کہ دکھی انسانیت کے دکھ بانٹنے سے دنیا کے ساتھ آخرت بھی سنورتی ہے، پنجاب حکومت کمزور طبقوں کی فلاح پر خصوصی توجہ دے رہی ہے، پناہ گاہوں اور لنگر خانوں کا دائرہ کار پنجاب کے دور دراز علاقوں تک بڑھایاجا رہا ہے، پناہ گاہوں اور لنگر خانوں کا قیام بے آسرا طبقے کیلئے عمل میں لایا گیا ہے۔

سردار عثمان بزدار نے کہا کہ غریب اور بے سہارا افراد معاشرے کی خصوصی توجہ کے طالب ہیں، لنگر خانوں اور پناہ گاہوں کا قیام فلاحی مملکت کی جانب بڑھتا ہوا قدم ہے، سیلانی ویلفیئر ٹرسٹ کمزور طبقات کیلئے قابلِ قدر کام کر رہا ہے، کمزور طبقات کی فلاح کے لئے سیلانی ویلفیئر ٹرسٹ کو معاونت جاری رکھیں گے۔

یاد رہے کہ اس موقع پر صوبائی سیکرٹری سماجی بہبود، افضل چامڑیا، میاں اطہر اور محمد حنید موجود تھے۔