وفاقی وزیر اطلاعات فواد چوہدری نے جہلم کی عوام کو خوشخبری سنا دی ہے۔

تفصیلات کے مطابق وفاقی وزیر اطلاعات ونشریات فواد چوہدری کا کہنا ہےکہ پنڈ دادن خان تا جہلم دورویہ سڑک کا ٹینڈرہو گیا، تمام لوازمات پورے کر دئیے گئے  اور ایف ڈبلیو او کو ٹھیکہ دے دیا گیا ہے۔

ذرائع کے مطابق وزیر اطلاعات نے بتایا کہ ایف ڈبلیو او اسی ماہ کام شروع کر دے گا، سولہ ارب کی لاگت سے یہ منصوبہ تین سال میں مکمل ہو گا، 116 کلومیٹر یہ سڑک ہے جس سے کشمیر کی ٹریفک کو لاہور یا اسلام آباد نہیں جانا پڑے گا۔

وفاقی وزیرفواد چوہدری نے بتایاکہ پنڈ دادن خان تا جہلم روڈ اس وقت کھنڈرات میں تبدیل ہو چکی ہے، سڑک کی تعمیرسے ترقی کے نئے دور کا آغاز ہو گا۔

اس سے قبل وفاقی وزیر اطلاعات فواد چوہدری نے کہا تھا کہ ‏پاکستان کی معاشی مشکلات زرداری اور نواز شریف کے دس سالوں کا تحفہ ہیں۔

وفاقی وزیر اطلاعات ونشریات فواد چوہدری نے سماجی رابطے کی ویب سائٹ ٹوئٹر پر جاری اپنی ٹو ئٹ میں کہا کہ آج اگر ہمیں اس سال بارہ ارب ڈالر کا قرضہ اور سود واپس نہ کرنا ہوتا تو یہ پیسہ تیل اوربجلی کو سبسڈی میں استعمال ہوتااور ہم دنیا میں قیمتوں میں اضافے کے رجحان سے بچ جاتے۔

فواد چوہدری نے مزید کہاکہ ان تاریک دس سالوں کے اثرات تباہ کن ہیں۔

پاکستان کی معاشی مشکلات زرداری-نواز شریف کے دس سالوں کا تحفہ ہیں، آج اگر ہمیں اس سال بارہ ارب ڈالر کا قرضہ اور سود واپس نہ کرنا ہوتا تو یہ پیسہ تیل اوربجلی کو سبسڈی میں استعمال ہوتا اور ہم دنیا میں قیمتوں میں اضافے کے رجحان سے بچ جاتے ان تاریک دس سالوں کے اثرات تباہ کن ہیں

— Ch Fawad Hussain (@fawadchaudhry) October 8, 2021

 اس کے بعد پاکستان مسلم لیگ (ن) کی ترجمان مریم اورنگزیب نے وزیر اطلاعات ونشریات فواد چوہدری کے بیان پر ردعمل دیتے ہوئے کہا کہ چوروں کو این آر او دے کر تباہی کا الزام دوسروں پر مت ڈالیں ،اس تباہی و ملک کی بربادی کا قصور وار صرف اور صرف عمران خان ہے۔

ترجمان مسلم لیگ ن نے کہاکہ پاکستان کی معاشی مشکلات عمران صاحب کی تین سال کی تاریخی کرپشن اور چوری کا تحفہ ہے، عمران صاحب نے 600 ارب کی چینی، 509 ارب کا آٹا، 800 کی ارب ایل این جی، 700 ارب کی دوائی چوری نہ کی ہوتی تو عوام آج مہنگائی اور بے روزگاری کی چکی میں نہ پس رہے ہوتے۔

مریم اورنگزیب نے کہاکہ 16000 ارب کا عمران صاحب قرض نہ لیتے تو یہی پیسہ اسکولوں اور ہسپتالوں پہ خرچ ہو رہا ہوتا، عمران صاحب اپنی اور اپنے اے ٹی ایمز اور مافیا کی جیبیں نہ بھرتے تو آج عوام کو سستا آٹا ، چینی بجلی گیس دوائی مل رہے ہوتے۔

انہوں نے کہا کہ ملک کے 74 سال میں اتنی تباہی نہیں آئی جو ان 3 سال میں عمران صاحب کی کرپشن چوری، نالائقی نااہلی سے آئی ہے، عمران صاحب کی لوٹ مار کے اثرات آنے والے دس سال تک قوم کو برداشت کرنے پڑیں گے۔

مسلم لیگ ن کی ترجمان کا کہنا ہےکہ ترقی کی شرح 5.8 فیصد، مہنگائی 3 فیصد والے ملک کو عمران صاحب کی تباہ کن کرپشن نے تنزلی کی دلدل میں دھکیل دیا، ایک ایسے ملک کو جہاں لوگوں کو روزگار مل رہا تھا، غربت اور غریبوں کی تعداد کم ہو رہی تھی، عمران صاحب کی تباہ کن کرپشن نے معاشی تباہی سے دو چار کر دیا۔

مسلم لیگی رہنما نے کہاکہ ایک ایسے ملک کو جہاں دہشت گردی ختم ہو رہی تھی، سی پیک آ رہا تھا، ملکی قرضے ختم ہو رہے تھے، عمران صاحب نے دوبارہ ریورس گیئر لگا دیا، ایک ترقی کرتے ملک کو عمران صاحب نے اپنی تباہ کن کرپشن سے ذلت و رسوائی اور تنزلی کی طرف دھکیلا ہے۔

مریم اورنگزیب نے کہا کہ عوام اب عمران صاحب اور کرائے کے ترجمانوں کے دھوکے میں نہیں آئیں گے، اپنے اعمال کا حساب دینا پڑے گا، عمران صاحب اور ان کے چور اے ٹی ایمز ملک پر مسلط نہ ہوتے تو آج پاکستان کی یہ حالت اور عوام کی زندگی اجیرن نہ ہوتی۔