جرمنی میں پاکستانی سفیر ڈاکٹر محمد فیصل نے کہا ہے کہ وزیر خارجہ مخدوم شاہ محمود قریشی نے مرحوم عمر شریف کی میت کی وطن واپسی کے لیے تمام ممکنہ امداد کی ہدایات جاری کردی ہیں۔

تفصیلات کے مطابق سماجی رابطے کی ویب سائٹ ٹوئٹر پر اپنے جاری کردہ ایک پیغام میں پاکستانی سفیر ڈاکٹر محمد فیصل کا کہنا تھا کہ فرینکفرٹ میں پاکستانی قونصل جنرل اور سفارت خانہ عمر شریف مرحوم کے اہل خانہ سے رابطے میں ہیں، وزیر خارجہ شاہ محمود قریشی نے عمر شریف کی میت کی وطن واپسی کے لیے تمام ممکنہ امداد کی ہدایات جاری کردی ہیں۔

CG Pakistan Frankfurt & @PakinGermany_ are in constant contact with accompanying family of late Mr. Shariff. @SMQureshiPTI has instructed all possible help & assistance for repatriation of deceased. We will update as situation unfolds @ForeignOfficePk @GermanyinPAK @ImranKhanPTI

— Dr Mohammad Faisal (@DrMFaisal) October 2, 2021

جرمنی میں پاکستانی سفیر ڈاکٹر محمد فیصل نے کہا کہ ہم صورتحال میں تبدیلی سے آگاہ کرتے رہیں گے۔

واضح رہے کہ پاکستان کے مایہ ناز کامیڈین عمر شریف جرمنی میں انتقال کرگئے ہیں۔

عمرشریف کو طبیعت خرابی کے باعث جرمنی منتقل کیا گیا تھا، عمر شریف عارضہ قلب اور دیگر مختلف بیماریوں میں مبتلا تھے، وہ گزشتہ کئی ہفتوں سے کراچی کے نجی اسپتال میں زیرِ علاج تھے۔

یاد رہے کہ عمر شریف کو علاج کے لیے امریکی دارالحکومت واشنگٹن پہنچایا  گیا تھا، جہاں معروف پاکستانی اداکارہ ریما خان کے شوہر اور ماہر امراض قلب ڈاکٹر طارق شہاب نے ان کے علاج کے لیے جارج واشنگٹن یونیورسٹی اسپتال میں انتظامات کر رکھے تھے۔

فخرِ پاکستان عمر شریف کی امریکا منتقلی اور اہل خانہ کے ویزوں کے لیے بھی ڈاکٹر طارق شہاب نے ہی تگ و دو کی تھی، عمر شریف کو لینے کے لیے ائیر ایمبولینس پیر کی دوپہر منیلا سے پاکستان پہنچی تھی۔

عمر شریف 19 اپریل 1955 کو پیدا ہوئے، عمر شریف نے اپنے کیریئر کا آغاز 1974 میں 14 سال کی عمر میں اسٹیج اداکاری سے کیا تھا، عمر شریف کو بہترین اداکار اور ڈائریکٹر کا ایوارڈ 1992 میں دیا گیا تھا،عمر شریف کو بہترین کارکردگی پر تمغہ امتیاز سے بھی نوازا گیا تھا۔