چین کے شمالی صوبے شین زی میں ہونے والی طوفانی بارشوں نے بڑے پیمانے پر تباہی مچادی ہے۔

چینی میڈیا کے مطابق حالیہ دنوں میں ہونے والی بارشوں کے باعث   15افراد ہلاک ہوچکے ہیں جبکہ 3 افراد تاحال لاپتہ ہیں۔

چینی میڈیا کے مطابق صوبہ شین زی میں سیلابی ریلوں سے ڈیم کے بند ٹوٹنے کے باعث 1 لاکھ 20 ہزار سے زائد افراد نقل مکانی پر مجبورہوگئے ہیں جبکہ مٹی کے تودے گرنے سے 17 ہزار مکانات اور عمارتیں بھی گرکر تباہ ہوچکی ہیں۔

چینی حکام کا کہنا ہے کہ صوبہ شین زی میں رواں ماہ معمول سے 5 گنا زیادہ بارشیں ہوئی ہیں۔

واضح رہے کہ چین میں حالیہ سیلانی صورت حال تین ماہ سے بھی کم عرصے میں پیش آئی، اس سے قبل چین کے صوبے ہنان میں شدید بارشوں کے باعث 300 کے قریب افراد ہلاک ہو گئے تھے۔