امریکہ کے نمائندہ خصوصی برائے افغانستان کل پاکستان پہنچیں گے۔

ذرائع کے مطابق نمائندہ خصوصی برائے افغانستان تھامس ویسٹ جمعرات کو اسلام آباد میں ٹرائیکا پلس اجلاس میں شرکت کریں گے۔

دورہ پاکستان کے دوران امریکی خصوصی ایلچی کی سیاسی و عسکری قیادت سے ملاقاتیں ہونگی۔

ملاقاتوں میں افغانستان میں امن و سلامتی کی صورتحال،اقتصادی بحالی، افغانستان میں انسانی حقوق کی صورتحال ااور باہمی دلچسپی کے معاملات پر تبادلہ خیال ہو گا۔

ملاقاتوں میں امریکہ کی جانب سے پاکستان کی فضائی حدود کے استعمال کے مطالبے پر بھی بات چیت کا امکان ہے۔

افغانستان پر روسی فیڈریشن کے نمائندہ خصوصی ضمیر کابلوو کے بھی کل اسلام آباد پہنچنے کا امکان ہے۔ ضمیر کابلوو ٹرائیکا پلس اجلاس میں شرکت کریں گے۔

ٹرائیکا پلس اجلاس میں شرکت کے لیے افغانستان کا ایک خصوصی وفد کل وزیر خارجہ امیر متقی کی قیادت میں پاکستان پہنچے گا۔

چین کے افغانستان پر خصوصی ایلچی یوئی یئاو ینگ بھی اسلام آباد میں ٹرائیکا پلس اجلاس میں شرکت کریں گے۔

ذرائع کے مطابق پاکستان کی نمائندگی نمائندہ خصوصی برائے افغانستان محمد صادق خان کریں گے۔

ٹرائیکا پلس اجلاس 11 اور 12 نومبر کو اسلام آباد میں منعقد ہو رہا ہے۔

اجلاس کے سائڈ لائنز پر مہمان وفود کی آپسی ملاقاتیں بھی ہوں گی۔

مہمان وفود کی وزیر خارجہ پاکستان شاہ محمود قریشی، وزیر اعظم عمران خان سمیت عسکری قیادت سے ملاقاتیں متوقع ہیں۔

واضح رہے کہ افغانستان کے قائم مقام وزیرِ خارجہ امیر خان متقی بھی پاکستان کی خصوصی دعوت پر آ رہے ہیں۔

افغان وزارت خارجہ کے ترجمان کا اس حوالے سے کہنا ہےکہ افغانستان کے قائم مقام وزیرِ خارجہ امیر خان متقی وفد کے ہمراہ کل (10 نومبر کو) پاکستان کا دورہ کریں گے۔

ذرائع کے مطابق دورہ پاکستان کے دوران معاشی صورتِ حال، ٹرانزٹ اور پڑوسی ممالک سے نقل و حمل میں آسانی کے حوالے سے بات چیت ہوگی۔