کراچی میں پیٹرول پمپس مالکان کی ہڑتال کے باعث شہر بھر میں فلاحی سرگرمیاں بھی متاثر ہو گئی۔

ذرائع کے مطابق فلاحی ادارے چھیپا فاؤنڈیشن نے 50 فیصد ایمبولنس کھڑی کردی ہیں۔

چھیپا فاؤنڈیشن کےترجمان کا کہنا ہےکہ پیٹرول کے حصول میں مشکلات کے باعث ایمبولنسز گراؤنڈ کی ہیں، ایمبولنس دستیاب نہ ہونے سے مریضوں اور اہل خانہ کو پریشانی کا سامنا ہے۔

دوسری جانب  ایدھی فاؤنڈیشن کا ریسکیو آپریشن ادارے کی ٹیلی فونک لائنیں منقطع ہونے سے متاثرہے۔

ترجمان ایدھی فاؤنڈیشن نے بتایاکہ ان کے پاس ایک ہفتے کا ایندھن ذخیرہ ہوتا ہے،  پیٹرول پمپس مالکان کی ہڑتال جاری رہی تو آئندہ روز میں مشکلات کا سامنا کرنا پڑ سکتا ہے۔

ترجمان ایدھی کا مزید کہنا ہےکہ شہر میں ایدھی فاؤنڈیشن کی 400 سے زائد ایمبولینسز یومیہ فلاحی سرگرمیوں میں مصروف رہتی ہیں۔

ذرائع کے مطابق چھیپا فاؤنڈیشن کی بھی 300 سے زائد ایمبولینسز شہر میں فلاحی سر گر میوں میں مصروف رہتی ہیں۔