ایڈیشنل آئی جی کراچی نے محکمہ پولیس میں ہندو ملازمین کو دیوالی کے موقع پر مبارکباد دی ہے۔

 آئی جی کراچی کامران فضل نے ہندو برادری کے تہوار دیوالی کے موقع پر پولیس کے ہندو ملازمین کے نام پیغام میں کہا کہ شہر میں امن و امان کی بحالی، دہشت گردی کے خاتمے اور جرائم پیشہ عناصر کے خلاف کارروائیوں میں معاشرے کی دیگر اکائیوں کی طرح ہندو برادری نے بھی پولیس کے شانہ بشانہ اپنا کردار ادا کیا ہے۔

ان کا کہنا تھا کہ ہندو برادری صحت، تعلیم اور دیگر شعبوں کی طرح محکمہ پولیس میں مختلف عہدوں پر اپنے فرائض و ذمہ داریاں احسن طریقے سے سر انجام دے رہی ہے۔

اس موقع پر کراچی پولیس چیف عمران یعقوب منہاس نے کراچی پولیس کے ہندو ملازمین سمیت تمام ہندو برادری کو دیوالی کے موقع پر مبارکباد دی اور نیک خواہشات کا اظہار کیا۔

ترجمان کراچی پولیس کا کہنا تھا کہ کراچی پولیس ہر سطح پر مذہب، فرقے اور رنگ و نسل سے بالا تر ہو کر فرض کی ادائیگی میں کوشاں ہے۔