میاں اسلم اقبال نے کہا ہے کہ جہاں کھیل کے میدان آباد ہوں، وہاں کے اسپتال ویران ہوتے ہیں۔

تفصیلات کے مطابق صوبائی وزیر صنعت وتجارت میاں اسلم اقبال نے صوبائی حلقہ 151کی مختلف پارکوں کا دورہ کیا اور ان میں تفریحی سہولیات کی بہتری کے لیے جاری ترقیاتی کاموں پر پیشرفت کا جائزہ لیا۔

مشیر سیاحت آصف محمود، ڈی جی پی ایچ اے جواد قریشی اور پی ایچ اے کے ڈائریکٹرز بھی ہمراہ تھے۔

صوبائی وزیر نے پارکوں میں تفریحی سہولیات کی بہتری کے کام کو مزید تیز کرنے اور ان کو خوبصورت بنانے کے لیے پی ایچ اے حکام کو ضروری ہدایات جاری کیں۔

میاں اسلم اقبال نے کہا کہ کھیل کے میدان اور پارک صحت مند معاشرے کے ضامن ہوتے ہیں ، صاف ستھرا ماحول اور بہتر تفریحی سہولیات سے مثبت سوچ پروان چڑھتی ہے ، شہریوں کو آلودگی سے پاک ماحول کی فراہمی حکومت کی ذمہ داری ہے ، پنجاب حکومت صوبے بھر کے پارکوں میں تفریحی سہولیات کو بہتر بنانے کے لیے موثر حکمت عملی پر عمل پیرا ہے۔

انہوں نے کہا کہ نئے پارک اور کھیل کے میدان بنانے کے ساتھ پہلے سے موجود پارکوں اور میدانوں کو بحال کیا جارہا ہے ، صوبائی حلقہ 151کے تمام پارکوں اور کھیل کے میدانوں کو بہتر بنایا جارہا ہے۔

صوبائی وزیر صنعت وتجارت میاں اسلم اقبال نے کہا کہ جن پارکوں میں بیٹھنے کی سہولت نہیں وہاں بنچز نصب کیے جائیں ، پارکوں میں بچوں کے لیے بہترین تفریحی سہولیات فراہم کی جائیں۔