معاون خصوصی وزیر اعلیٰ پنجاب برائے اطلاعات و ترجمان حکومت پنجاب حسان خاور نے کہا ہے پی ڈی ایم کا کراچی شو بھی بری طرح فلاپ رہا۔

ترجمان پنجاب حکومت حسان خاور نے اپنے جاری کردہ ایک بیان میں کہا کہ پہلے مریم اور آج  شہباز شریف مولانا فضل الرحمن کے ساتھ کھڑے ہوگئے، پی ڈی ایم کا کراچی شو بھی بری طرح فلاپ رہا۔

ان کا کہنا تھا کہ بھتیجی نے ڈیرہ غازی خان سے راہ فرار اختیار کی اور شہباز شریف نے کراچی سے، ن لیگ جو کھیل کھیل رہی ہے وہ مولانا فضل الرحمن کی سمجھ میں نہیں آئے گا، مسترد شدہ سیاستدانوں کا ناجائز اتحاد پی ڈی ایم آخری ہچکیاں لے رہا ہے، پی ڈی ایم پاکستان کی سیاسی تاریخ کا نالائق ترین اور ناکام ترین اتحاد ثابت ہوا ہے۔

انہوں نے کہا کہ پی ڈی ایم پاکستان کی سیاسی تاریخ کا نالائق ترین اورناکام ترین اتحاد ثابت ہوا ہے، سیاست کو ذاتی تجوریاں بھرنے کیلئے استعمال کرنے والوں کے دوغلے چہرے عوام کے سامنے بے نقاب ہو چکے ہیں، کراچی کے محبِ وطن شہریوں نے پی ڈی ایم کے مسترد شدہ عناصر کو ان کی اوقات یاد کروا دی ہے۔

 معاون خصوصی وزیر اعلیٰ پنجاب برائے اطلاعات و ترجمان حکومت پنجاب حسان خاور کا مزید کہنا تھا کہ وزیر اعظم عمران خان کی ایماندار قیادت کے سامنے لٹیروں کی منفی سیاست ختم ہو چکی ہے، پی ڈی ایم کی گھسی پٹی فلم نہ پہلے چلی نہ آئندہ چلے گی، ان عناصر کی قسمت میں رونا لکھا ہے اور یہ 2023 اور اس کے بعد بھی روتے رہیں گے۔