لاہور میں اسموگ نے ڈیرے ڈال لئے، شہری آنکھوں اور سانس کی بیماریوں میں مبتلا ہو گئے۔

فضائی آلودگی کےاعتبار سے پاکستان کا شہرلاہور آج دنیا کےآلودہ ترین شہروں میں پہلے نمبر پر ہے۔

ایئرکوالٹی انڈیکس کے مطابق لاہور کی فضاؤں میں آلودہ ذرات کی مقدار 410 جبکہ کراچی میں 155 پرٹیکیولیٹ میٹرز ریکارڈ کی گئی۔

صوبائی دارالحکومت لاہور میں سموگ کا سبب بننے والوں کے خلاف سخت کارروائی کی جارہی ہے۔

پنجاب کے علاقے پتوکی میں صبح اور شام کے اوقات میں اسموگ کا راج برقرار ہے ، جہاں بااثر زمینداروں کی جانب سے فصلوں کی باقیات کو جلانے کا سلسلہ بھی جاری ہے۔

اس کے علاوہ فیکٹریوں اور بھٹوں سے نکلنے والا دھواں اسموگ کے ساتھ ساتھ مختلف بیماریاں  بھی پھیلا نے کا سبب بن رہا ہے

دوسری جانب کراچی میں بھی آلودگی کا سلسلہ برقرار ہے۔

دنیا کے آلودہ شہروں میں کراچی نواں نمبرہے، ایئر کوالٹی انڈیکس کے مطابق شہر میں آلودگی کی موجودہ شرح 155 ہے.

محکمہ موسمیات کے مطابق شہر قائد میں سرد اور خشک ہواؤں کا راج ہے،  کم سے کم درجہ حرارت 19 ڈگری سینٹی گریڈ ریکارڈ کیا گیا ہے۔

شہر کا موجودہ درجہ حرارت 23 ڈگری سینٹی گریڈ ہے، آج زیادہ سے زیادہ درجہ حرارت 30 سے 32 ڈگری سینٹی گریڈ رہنے کا امکان ہے جبکہ ہوا میں نمی کا تناسب 60 فیصد ہے۔