خسرے کے انجیکشن لگانے میں غفلت کے باعث 2 بچیاں جاں بحق ہوگئی ہیں۔

تفصیلات کے مطابق جاں بحق ہونے والی بچیوں کے والد کا کہنا ہے کہ میرے گھر کے 2 بچیوں کی ہلاکت خسرے کے دوران ٹیم کی جانب سے انجیکشن لگانے غفلت اور لاپرواہی سے ہوئی۔

سابق کونسلر میونسپل کمیٹی قلعہ عبداللہ کا کہنا ہے کہ انجکشن لگانے سے بچوں کی حالت روز بروز خراب ہوتی گئی دیگر کی حالت تشویشناک ہے،  واقعہ کی اعلیٰ سطح پر انکوائری کروائی جائے۔

میونسپل کمیٹی قلعہ عبداللہ کے سابق کونسلر اور سماجی رہنماء شیر علی اچکزئی نے کہا ہے کہ ان کے گھر کے 2 معصوم بچیاں گزشتہ 17 نومبر کو روبیلا مہم کے دوران ٹیم کی جانب سے خسرے کی بیماری کے باوجود بھی ناتجربہ کاری غفلت اور نااہلی سے جان سے ہاتھ دھو بیٹھی، ناتجربہ کار ٹیم نے تشخیص کے بغیر بچوں کو ویکسین لگایا حالانکہ بچے اس وقت بخار میں تھے۔

انہوں نے کہا کہ ایسا علاقے میں پہلی بار نہیں ہوا ہے بلکہ ناتجربہ کار ٹیمیں درجنوں بچوں کی ہلاکت کے ذمہ دار ہے، اعلیٰ حکام کو اس پر نظرثانی کرنے کی ضرورت ہے اس سے مزید معصوموں کی زندگی کو بچانا ہے ان کا کہنا تھا کہ اب ٹیمیں ان کے گھر آکر ان کے چھوٹے بھائیوں سے بیان لیتے ہیں کہ یہ ہلاکتیں انجیکشن سے نہیں بلکہ خسرے سے ہوئی ہے یہ عمل قابلِ گرفت ہے۔

ان کا کہنا تھا کہ ہم اس کی مذمت کرتے ہیں ہم اس اقدام کیخلاف اعلیٰ حکام سے شکایت کریں گے، انہوں نے مطالبہ کیا کہ اعلیٰ سطح پر اس کی تحقیقات کروائی جائے۔