صوبائی وزیر صنعت و تجارت میاں اسلم اقبال نے کہا ہے کہ پنجاب میں سرمایہ کاری کو فروغ دینے کے لئے تین اہم معاہدوں پر دستخط کئے گئے ہیں۔

میاں اسلم اقبال کی زیرِ قیادت پنجاب انڈسٹریل اسٹیٹس ڈویلپمنٹ اینڈ مینجمنٹ کمپنی کی دبئی ایکسپو اور بین الاقوامی بزنس کانفرنس ہوئی جس میں صوبائی وزراء ہاشم جواں بخت، راجہ یاسر ہمایوں اور سیکرٹری ڈاکٹر واصف خورشید نے شرکت کی۔

کانفرنس میں صوبائی وزیر صنعت و تجارت میاں اسلم اقبال کا کہنا تھا کہ پنجاب میں سرمایہ کاری کو فروغ دینے کے لئے تین اہم معاہدوں پر دستخط کئے گئے ہیں جبکہ رومی فیبرکس، گلوبل پیکجنگ اور پٹپاک فلمز پرائیوٹ لیمیٹڈ سے معاہدے کئے گئے۔

انہوں نے کہا کہ رومی فیبرکس کے ڈائریکٹر خواجہ نجم الدین اور گلوبل پیکجنگ کے سی ای او نویڈ گوڈیل نے معاہدوں پر دستخط کئے، معاہدے کے باعث پنجاب میں 45 ارب روپے کی ملکی و غیر ملکی سرمایہ کاری حاصل ہو گی۔

صوبائی وزیر صنعت و تجارت میاں اسلم اقبال کا مزید کہنا تھا کہ ہزاروں نئی نوکریاں فراہم کی جا سکیں گی، صنعت دوست پالیسیوں کے باعث سرمایہ کار پنجاب میں صنعتیں لگانے کو ترجیح دے رہے ہیں۔