وزیراعظم عمران خان کی زیر صدارت اتحادی جماعتوں کا مشاورتی اجلاس ہوا جس میں وزیراعظم نے اتحادی جماعتوں کو کالعدم تنظیم تحریک لبیک پاکستان ( ٹی ایل پی ) کے ساتھ معاہدے پر اعتماد میں لیا۔

دوران اجلاس اتحادی جماعتوں نے اہم قومی معاملات پر مشترکہ موقف اپنانے اور پارلیمنٹ کا مشترکہ اجلاس جلد بلانے پر اتفاق کیا۔

ذرائع کے مطابق وزیراعظم عمران خان نے اجلاس میں اتحادی جماعتوں کو قانون سازی سے متعلق اعتماد میں لیا۔

ذرائع کا کہنا ہے کہ اجلاس  میں پارلیمنٹ کا مشترکہ اجلاس پیر کو بلانے کا بھی فیصلہ کیا گیا جبکہ مشترکہ اجلاس میں انتخابی اصلاحات اور الیکٹرانک ووٹنگ مشین کے استعمال سے متعلق بل منظور کروایا جائے گا۔

اجلاس میں متحدہ قومی موومنٹ (ایم کیو ایم) پاکستان، مسلم لیگ (ق) اور گرینڈ ڈیموکریٹک الائنس (جی ڈی اے) کے ارکان شریک ہوئے ۔

 اجلاس میں ایم کیو ایم سربراہ خالد مقبول صدیقی، وزیر قانون فروغ نسیم، وفاقی وزیر انفارمیشن ٹیکنالوجی سید امین الحق، عوامی مسلم لیگ کے سربراہ اور وفاقی وزیر شیخ رشید، جے ڈی اے کی ڈاکٹر فہمیدہ مرزا، ق لیگ کے وفاقی وزیر مونس الہٰی نے بھی شرکت کی۔