مشیر خزانہ شوکت ترین نے کہا ہے کہ سیلز ٹیکس کی چھوٹ ختم کر دی جائے گی۔

تفصیلات کے مطابق منی بجٹ کی تیاریاں مکمل کر لی گئیں، مشیر خزانہ شوکت ترین کو متعلقہ وفاقی اداروں سے منی بجٹ فریم ورک موصول ہو گیا ہے۔

وزارت خزانہ ذرائع کے مطابق منی بجٹ فریم ورک ملکی تاریخ کا سب سے بڑا منی بجٹ ہو گا۔ 800 ارب روپے رواں مالی سال میں اضافی حاصل کرنے کی کوشش کی جائے گی۔

وزارت خزانہ ذرائع کا کہنا تھا کہ ایف بی آر کا ٹیکس محصولات میں کم از کم 530 ارب روپے کا اضافہ کرنے کا پلان ہے۔ بجلی اور گیس کی قیمت بڑھانے سے 7 ماہ میں 250 ارب روپے حاصل کیے جائیں گے۔

وزارت خزانہ ذرائع نے کہا کہ پٹرولیم لیوی کے ذریعے بھی اضافی بھاری محصولات حاصل کرنے کی کوشش کی جائے گی، سیلز ٹیکس کی چھوٹ ختم کر دی جائے گی۔ انکم ٹیکس میں ود ہولڈنگ کی سٹیج پر رعایتوں کا خاتمہ کیا جائے گا، جون تک 2000 ارب روپے اضافی ہدف کے حصول کےلئے آئی ایم ایف کی شرط مان لی گئی۔

ذرائع وزارت خزانہ کے مطابق حکومت ٹیکس، بجلی، لیوی اور گیس کے شعبوں کے علاوہ بھی اقدامات کرے گی۔ منی بجٹ کی تفصیلات اعلان کے بعد متعلقہ نوٹیفکیشن کے ذریعے سامنے آئے گی۔