وفاقی وزیر منصوبہ بندی اسد عمر کی زیرِ صدارت کابینہ کمیٹی برائے توانائی کا اجلاس ہوا ہے جس میں اوگرا نے جرمانوں اور تادیبی کارروائیوں سے متعلقہ قواعد پر نظر ثانی پر بریفنگ دی۔

بریفنگ میں کہا گیا کہ لائسنس اور قواعد پر عملدر آمد نہ کرنے پر جرمانے کئے جائیں گے، بڑی خلاف ورزی پر ایک کروڑ سے 50 کروڑ تک جرمانہ ہوگا جس پر کمیٹی نے ہدایت کی کہ ناجائز منافع اور فراڈ پر سخت اضافی اقدامات کئے جانے چاہئیں۔

اجلاس میں اوگرا نے پیٹرولیم مصنوعات کی فروخت کے مانیٹرنگ سسٹم سے متعلق آگاہ کیا جس پر کمیٹی نے ہدایت دی کہ موثر رپورٹنگ سسٹم کے اطلاق کرنے کیلئے ٹھوس اقدامات کئے جائیں۔

اوگرا نے پیٹرولیم ڈویژن کی موسم سرما میں گیس کی فراہمی اور دستیابی پر بھی بریفنگ دی جس پر کمیٹی نے آئندہ اجلاس میں جامع گیس لوڈ منیجمنٹ پلان کی فراہمی کی ہدایت دی۔