جماعت اسلامی کے سینیٹر مشتاق احمد خان نے کہا ہے کہ نااہل اور کرپٹ حکومت نے اپنے تین سالوں میں صرف مہنگائی دی ہے۔

تفصیلات کے مطابق جماعت اسلامی کے سینیٹر مشتاق احمد خان نے پشاور میں پریس کانفرس کرتے ہوئے کہا کہ ناقص پالیسیوں کی وجہ سے مہنگائی عروج پر پہنچ گئی ہے، بیرونی قرضوں میں گزشتہ تین سالوں میں 27 ارب روپے کا اضافہ ہوا ہے۔

مشتاق احمد خان کا کہنا تھا کہ پٹرول، گھی اور آٹا سمیت پٹرول کی قیمتوں میں 70 فیصد اضافہ ہوگیا ہے، گرمی میں بجلی نہیں ہوتی، سردی میں گیس نہیں ہوتی، صوبائی و وفاقی کابینہ میں بیٹھے لوگ مافیا ہے۔

انہوں نے کہا کہ موجودہ حکومت کی وجہ سے پاکستانی نظام بہت خراب ہو گیا ہے، قومی ادارے تباہ ہو کر رہے گئے ہیں، شارجہ سے سری نگر فلائیٹ کھول کر وزیر اعظم عمران خان نے مودی کا یار ہونے کا ثبوت دے دیا ہے۔

جماعت اسلامی کے سینیٹر مشتاق احمد خان کا کہنا تھا کہ فاٹا میں نوکریاں دینے کا وعدہ کیا تھا، مگر تاحال کچھ نہ ہو سکا، فاٹا میں نہ اسکول ہے اور نہ ہسپتال، لوگ علاج اور تعلیم کی بنیادی سہولیات سے محروم ہیں، نوجوان نسل آج تباہی کی طرف گامزن ہے، ریاست مدینہ کا نام لینے والی حکومت نے 3 سالوں میں غیر شری اور غیر قانون سازی کی۔

ان کا کہنا تھا کہ 2 سال تک پاکستان تحریک انصاف نے لوکل گورنمنٹ الیکشن کو روکے رکھا، میں الیکشن کمیشن کا مشکور ہوں جنھوں نے الیکشن کروانے کا فیصلہ کر لیا، ہائی کورٹ کے فیصلے نے حکمران جماعت کے خواب پانی میں ملا دیئے۔

جماعت اسلامی کے سینیٹر مشتاق احمد خان نے مزید کہا کہ لوکل گورنمنٹ الیکشن ہم ترازو کے نشان پر لڑیں گے، جماعت اسلامی نے تحصیل ناظم امیدواروں کے ناموں کا اعلان کر دیا، پشاور سمیت خیبر پختونخوا کے مختلف اضلاع سے 65 امیدوار میدان میں ہوں گے۔