وزیر خارجہ مخدوم شاہ محمود قریشی نے کہا ہے کہ ملک میں انتخابات کا ایسا نظام رائج ہونا چاہیئے جس کی شفافیت پر سب کو مکمل اعتماد ہو۔

شاہ محمود قریشی نے اپنے جاری کردہ ایک بیان میں کہا کہ اجلاس کا مقصد اتحادی جماعتوں کے اراکین کو عوامی فلاح و بہود کو ملحوظ خاطر رکھتے ہوئے مختلف قانونی بلوں میں تجویز کردہ ترامیم کے حوالے سے اعتماد میں لینا تھا، اس حوالے سے معزز اراکین کو آگاہ کیا گیا ان کی آراء کو سنا گیا تاکہ کل کو جب وہ ان قانون بلز کی سپورٹ کریں تو ان کے علم میں ہو کہ ان بلوں میں عوامی فلاح کے کون سے عوامل مضمر ہیں۔

انہوں نے کہا کہ ان بلز میں وزارتِ داخلہ، وزارتِ تعلیم، وزارتِ بحری امور، وزارتِ قانون و انصاف، وزارتِ موسمیاتی تبدیلی سمیت مختلف وزارتوں کے بلز شامل ہیں، آج ہم نے اپنے اتحادیوں کو بریفنگ دی اور ان کو ڈیماسٹریشن بھی دی تاکہ انہیں مکمل اعتماد حاصل ہو۔

ان کا کہنا تھا کہ اس کا مقصد شفافیت ہے تاکہ ملک میں انتخابات کا ایسا نظام رائج ہو جس کی شفافیت پر سب کو مکمل اعتماد ہو، کچھ دوستوں نے ہماری بریفنگ کو سننے کے بعد اپنی قیادت سے مشاورت کرنے کے بعد مطلع کرنے کا کہا۔

وزیر خارجہ مخدوم شاہ محمود قریشی نے کہا کہ اتحادی اراکین کی اکثریت کا ردعمل مثبت تھا۔