سانحہ آرمی پبلک اسکول کیس میں کل کی سماعت کا تحریری حکم نامہ جاری ہوگیا ہے۔

حکم نامے کے مطابق وزیر اعظم عمران خان نے عدالت کو بتایا کہ اپنی ذمہ داریوں سے آگاہ ہیں، وزیر اعظم کے بقول شہداء کے والدین کے دکھ کے ازالے کی ہر ممکن کوشش کر رہے ہیں، عمران خان نے یقین دہانی کروائی غفلت برتنے والوں کیخلاف کارروائی ہوگی۔

سپریم کورٹ کے مطابق لواحقین اپنے بچوں کی شہادت پر کوئی عذر قبول کرنے کو تیار نہیں۔

حکم نامے میں کہا گیا کہ والدین چاہتے ہیں ان کے نامزد افراد کیخلاف کارروائی کی جائے۔

سپریم کورٹ نے وفاقی حکومت کو مثبت اقدامات کر کے وزیر اعظم کی دستخط شدہ رپورٹ پیش کرنے کا حکم دیا اور کہا کہ وفاقی حکومت شہداء کے والدین کا موقف بھی سنے۔

   یاد رہے کہ کیس کی مزید سماعت 4 ہفتوں کیلئے ملتوی ہوگئی ہے، سپریم کورٹ نے 20 اکتوبر کے حکم نامے کو بھی گزشتہ روز کے آرڈر کا حصہ بنایا۔