لمبی ترین ناک والے ترک شہری کو گنیز بک ورلڈ ریکارڈ میں شامل کرلیا گیا۔

گنیز بک ورلڈ ریکارڈ کی جانب سے فوٹو شیئرنگ ایپ انسٹاگرام پر ایک ترک شہری کی ویڈیو جاری کی گئی ہے جسے دنیا کی لمبی ترین ناک رکھنے والے زندہ انسان کا اعزاز دیا گیا ہے۔

گنیز بک ورلڈریکارڈ کے مطابق ترک شہری کی ناک دوسرے لوگوں سے مختلف اور لمبی ہے، ان کی ناک 8.8 سینٹی میٹر (3.46 انچ) ہے، جو دنیا میں کسی بھی زندہ انسان کی سب سے لمبی ناک ہے۔

ترک شہری مہمت اوزیرک نے گنیز بک ورلڈ ریکارڈ کی جانب سے لمبی ناک والے انسان کا خطاب دیے جانے پر خوشی کا اظہار کرتے ہوئے کہا کہ مجھے اپنی ناک پر فخر ہے تاہم میرے دوست مجھے لمبی ناک والا کہہ کر تنگ کرتے تھے۔

انہوں نے کہا کہ میں جہاں بھی جاتا تھا سب میں غور غور سے دیکھتے اور نوٹ کرتے تھے، حالانکہ میں جانتا تھا وہ سب میرے بارے میں کیا تاثرات رکھتے تھے لیکن میں خاموشی سے آگے نکل جاتا کیوں کہ خدا نے مجھے ایسا ہی بنایا ہے اور میں اس پر خوش ہوں۔

مہمت اوزیرک نے کہا کہ مجھے لمبی ناک آباو اجداد سے ملی ہے ، میرے والد اور میرے انکل کی ناک لمبی تھی لیکن یہ مجھ پر رک گیا ہے اور آگے میری نسل میں کسی کی لمبی ناک نہیں ہے۔

ترک شہری نے کہا کہ میری سونکھنے کی حس بہت تیز ہے اور اس بات کو لے کر میرے دوست میرا مزاق بھی اڑاتے تھے ، میں جہاں بھی جاتا وہ مجھے چھیڑتے کہ بتاو یار کسی چیز کی مہک یا بدبو آرہی ہے اور کہاں سے آرہی ہے۔

مہمت ایزیرک نے بتایا کہ میں دوستوں کی بات کا برا نہیں مانتا تھا بلکہ میں اسے اپنی ایک خصوصیت مانتا تھا کہ میں وہ کرسکتا ہوں جو دوسرے نہیں کرسکتے۔