بھارتی جاسوس کلبھوشن یادیو کے حق میں قانون سازی کو مسترد کرنے کی قرارداد پنجاب اسمبلی میں جمع کر دی گئی۔

قرارداد مسلم لیگ(ن) کی رکن سمیرا کومل کی جانب سے جمع کرائی گئی۔

قرار داد کے متن میں درج ہےکہ یہ ایوان بھارتی جاسوس کلبھوشن یادیو کے حق میں پارلیمنٹ سے بل پاس کرنے کی شدید مذمت کرتا ہے۔

متن میں کہاگیا کہ عالمی عدالت کے کہنے پر بھارتی جاسوس کے لئے قانون سازی کی جارہی ہے، کلبھوشن یادیو ہزاروں پاکستانیوں کے قتل کا خود اعتراف کرچکا ہے۔

قرارداد کے متن کے مطابق ہمارے بچوں کے قاتل کو اس طرح ریلیف دینا شہداء کے خون سے غداری ہے، یہ ایوان بھارتی جاسوس کلبھوشن یادیو کے حق میں پاس کیے بل کو مسترد کرتا ہے۔

اس حوالے سے گزشتہ روز پیپلز پارٹی کے سینیٹر مصطفیٰ نواز کھوکھر نے کہا کہ وزیراعظم عمران خان نے آج کلبھوشن کو این آر او دے دیا۔

سماجی رابطے کی ویب سائٹ پر جاری بیان میں مصطفیٰ نواز کھوکھر نے کہا کہ ایبسولیوٹلی ناٹ کہنے والے وزیراعظم نے آج کلبھوشن کو این آر او دے دیا۔

انہوں نے کہا کہ وزیراعظم نے ملک کی معاشی خودمختاری اغیار کے قدموں میں رکھ دی۔

ایبسولوٹلی ناٹ کہنے والے وزیراعظم نے آج کلبھوشن کو NRO اور ملک کی معاشی خودمختاری مکمل طور پر اغیار کے قدموں میں رکھ دی

— Mustafa Nawaz Khokhar (@Mustafa_PPP) November 17, 2021

مشیر برائے پارلیمانی اموربابر اعوان کا کہنا تھا کہ بین الاقوامی عدالت کے فیصلے کی تعمیل کےتحت کلبھوشن بل پارلیمنٹ کے مشترکہ اجلاس میں پیش کیا گیا۔

کلبھوشن یادیو کو عالمی عدالت انصاف نظرثانی غور مکرر بل 2021ء بھی پارلیمنٹ کے مشترکہ اجلاس میں منظور کر لیا گیا۔

الیکشن ایکٹ دوسرا ترمیمی بل بھی منظوری کے لیے مشیر برائے پارلیمانی امور بابر اعوان نے ایوان میں پیش کیاگیا۔

پارلیمنٹ نے حکومت کا انتخابی ترمیمی بل 2021 منظور کر لیا۔

اس کے ساتھ ساتھ سمندر پار پاکستانیوں کو انٹرنیٹ کے ذریعے ووٹنگ کا حق اور الیکٹرانک ووٹنگ مشین کے استعمال کا بل بھی پاس کر لیا گیا۔

 بھارتی جاسوس کلبھوشن یادیو کو عالمی عدالت انصاف نظرثانی غور مکرر بل 2021 بھی پارلیمنٹ کے مشترکہ اجلاس میں منظور کر لیا گیا۔

حکومتی بل منظور ہونے پر ایوان میں “کون بچائے گا پاکستان عمران خان عمران خان ” کے نعرے لگائے گئے جبکہ اپوزیشن کی جانب سے ایوان میں ڈویژن کروانے کا مطالبہ کیا گیا۔

دوسری جانب حکومتی بل پاس ہونے پر وزیراعظم عمران خان سمیت حکومتی ارکان پارلیمنٹ نے ڈیسک بجا کر خوشی کا اظہار کیا جبکہ حکومتی بل منظور ہونے پر اپوزیشن نے ایوان سے واک آؤٹ کر دیا۔