بجلی کی قیمتوں میں اضافے کے خلاف پنجاب اسمبلی میں مذمتی قرارداد جمع کروا دی گئی ہے۔

تفصیلات کے مطابق قرارداد مسلم لیگ (ن) کی رکن سعدیہ تیمور کی جانب سے جمع کروائی گئی ہے۔

قرارداد کے متن میں کہا گیا ہے کہ یہ ایوان بجلی کی قیمت میں 1 روپیہ 38 پیسے اضافے کی شدید مذمت کرتا ہے، بجلی، پیٹرول کی قیمتوں میں مسلسل اضافے سے ملک کی انڈسٹری تباہی کے دہانے پر پہنچ چکی ہے۔

متن میں مزید کہا گیا ہے کہ بجلی کی قیمت میں اضافے کا اثر براہ راست تمام ضروریات زندگی کی اشیاء پر پڑتا ہے، حکومت آئی ایم ایف کو خوش کرنے کے لئے غریب کی کمر توڑ رہی ہے، مہنگائی کی وجہ سے عام آدمی کا چولہا پہلے ہی ٹھنڈا پڑ چکا ہے۔

قرارداد میں مطالبہ کیا گیا کہ بجلی کی قیمت میں اضافے کو فوری واپس لیا جائے۔

واضح رہے کہ گزشتہ روز حکومت نے عوام پر ایک اور مہنگائی کا بم گرا دیا، پیٹرول کے بعد اب بجلی بھی مہنگی کردی گئی۔

نیشنل الیکٹرک ریگولیٹری اتھارٹی (نیپرا) نے بنیادی بجلی ٹیرف میں 1 روپیہ 68 پیسے فی یونٹ اضافے کی منظوری دے دی اور بجلی مہنگی کرنے کا نوٹیفیکیشن بھی جاری کر دیا۔

نیپرا کے مطابق بجلی کے بنیادی ٹیرف میں اضافہ وفاقی حکومت کی درخواست پر کیا گیا، اضافے کے بعد بجلی کی فی یونٹ اوسط قیمت 15.36 روپے ہو گئی ہے۔

ترجمان نیپرا کا کہنا تھا کہ اضافے کا اطلاق کے الیکٹرک سمیت بجلی کی تمام تقسیم کار کمپنیوں پر ہو گا جبکہ فیصلے کا اطلاق وفاقی حکومت کے نوٹیفیکیشن کے بعد ہو گا۔

ترجمان کا یہ بھی کہنا تھا کہ ماہانہ 200 یونٹ تک استعمال کرنے والوں پر اضافہ لاگو نہیں ہو گا جبکہ 200 سے زائد یونٹ کےاستعمال پرگھریلوصارفین کیلئے بجلی ایک روپے 68 پیسے مہنگی ہوگی۔

 ترجمان نیپرا کا مزید کہنا تھا کہ اضافے سے بجلی صارفین کو 135 ارب روپے اضافی ادا کرنے ہوں گے جبکہ کمرشل، صنعتوں اور باقی شعبوں کیلئے بجلی کی قیمت میں فی یونٹ ایک روپیہ 39 پیسے اضافہ ہوگا۔