وزیراعظم عمران خان نے کہا ہے کہ انسانی ہمدردی کی بنیاد پر افغان عوام کو ہر ممکن مدد فراہم کریں گے۔

عمران خان سے قائم مقام افغان وزیر خارجہ کی ملاقات ہوئی جس  میں وزیراعظم نے درپیش سنگین چیلنجوں پر قابو پانے کے لیے افغانستان اور افغان عوام کے لیے پاکستان کی حمایت کا اعادہ کیا۔

Mr. Amir Khan Muttaqi, Acting Foreign Minister of Afghanistan, called on Prime Minister @ImranKhanPTI, today. He was accompanied by Acting Ministers for Finance as well as Industry & Commerce and other senior members of the Afghan delegation pic.twitter.com/mzHoBaNPue

— Prime Minister’s Office, Pakistan (@PakPMO) November 12, 2021

  وزیراعظم نے پاکستان اور خطے کے لیے پرامن، مستحکم، خودمختار، خوشحال اور منسلک افغانستان کی اہمیت پر زور دیا جبکہ وزیر اعظم نے افغانستان کے منجمد اثاثوں کو جاری کرنے اور معاشی بدحالی کو روکنے کے لیے بینکنگ لین دین میں سہولت فراہم کرنے کی فوری ضرورت پر زور دیا۔

عمران خان نے خطے میں ترقی اور خوشحالی کے فروغ کے لیے دونوں ممالک کے عوام کی نقل و حرکت، تجارت، ٹرانزٹ اور علاقائی رابطوں کی سہولت کے لیے مل کر کام کرنے کی اہمیت پر بھی زور دیا۔

ملاقات میں وزیراعظم نے کہا کہ سلامتی اور پرعزم انسداد دہشت گردی کی کارروائیاں، تمام افغانوں کے حقوق کا احترام، اور نظم و نسق اور سیاست میں شمولیت افغانستان کے استحکام میں مزید معاون ثابت ہوگی۔

عمران خان  کا کہنا تھا کہ امید ہے عبوری افغان حکومت تعمیری طور پر بین الاقوامی برادری سے منسلک رہے گی  جبکہ  افغان عبوری حکومت موجودہ چیلنجز سے نمٹنے کے لیے بھی  مثبت اقدامات کرتی رہے گی

وزیراعظم نے کہا کہ  پاکستان مسلسل افغانستان کے لیے فوری انسانی امداد کی فراہمی کا مطالبہ کرتا رہا ہے سردیوں کے موسم میں انسانی ہمدردی کی بنیاد پر افغان عوام کو ہر ممکن مدد فراہم کریں گے۔

 عمران خان  نے یہ بھی کہا کہ پاکستان افغانستان  کی عوام کے لیے ضروری غذائی اشیاء بشمول گندم اور چاول، ہنگامی طبی سامان اور پناہ گاہ کی اشیاء فراہم کرے گا۔

وزیراعظم عمران خان  نے مزید کہا کہ پاکستان انسانی ہمدردی کے مقاصد اور طریقہ کار کے مطابق غیر معمولی بنیادوں پر پاکستان کے راستے بھارت کی طرف سے پیش کردہ گندم کی نقل و حمل کے لیے افغان بھائیوں کی درخواست پر احسن طریقے سے غور کرے گا۔

ملاقات میں قائم مقام وزراء برائے خزانہ ، صنعت و تجارت اور افغان وفد کے دیگر سینئر ارکان  بھی شریک ہوئے۔