گورنر سندھ عمران اسمٰعیل سے ایسوسی ایشن آف بلڈرز اینڈ ڈیویلپرز (آباد) کے 15 رکنی وفد کی محسن شیخانی کی سربراہی میں گورنر ہاﺅس میں ملاقات ہوئی ہے۔

ملاقات میں وفد نے کنسٹرکشن انڈسٹری کو در پیش چیلنجز اور دیگر مسائل سے آگاہ کیا اور تجاویز بھی پیش کیں، وفد کا کہنا تھا کہ ماضی میں ملک کے دیگر صوبوں کی طرح کراچی سمیت سندھ کے دیگر شہروں کے لئے ریگو لرازیشن کی حکمت عملی مرتب کی جائے۔

وفد کے مطابق ریگو لرائزیشن پالیسی کے تحت ریگو لرائزیشن کمیشن کا قیام ناگزیر ہے، کنسٹرکشن کے حوالے سے بلڈنگ این او سی اور اپروول پروسیجرز ون ونڈو آپریشن کے تحت ممکن بنایا جائے۔

آباد وفد کا کہنا تھا کہون ونڈو آپریشن پر عمل درآمد سے پروجیکٹ مکمل ہونے پر بلڈرز اور رہائشیوں کو بعد میں کسی بھی قسم کی پریشانی کا سامنا نہیں ہوگا، نسلہ ٹاور کے مکین جس پریشانی سے گزر رہے ہیں اسے انسانی بنیادوں پر دیکھا جائے، نسلہ ٹاور کے رہائشیوں کی بحالی کے لئے کوئی حکمت عملی تیار کی جائے۔

وفد نے وزیر اعظم عمران خان سے ملاقات کی خواہش کا اظہار کیا جس پر گورنر سندھ نے جلد ملاقات کرانے کی یقین دہانی کروائی۔