سعودی عرب میں ہمنوا لیڈیز کلب کی جانب سے رنگا رنگ فیملی ایونٹ کا انعقاد کیا گیا جس میں سفارت خانہ پاکستان سمیت کیمونٹی ممبران کی بڑی تعداد موجود تھی۔

تفصیلات کے مطابق دارالحکومت ریاض میں ہمنوا لیڈیز کلب کی جانب سے منعقد ہونے والے فیملی ایونٹ میں شریک سینکڑوں مرد و خواتین سمیت بچوں کے لئے تفریحی کا ماحول فراہم کیا گیا تھا جس میں دیگر گیمز کی طرح پینٹ بال گیم میں چھوٹوں اور بڑوں نے خوب دلچسپی لی اور دن بھر مختلف ٹیموں کے درمیان مقابلے جاری رہے جبکہ میوزک کے تڑکے نے بھی خوب سماں باندھا اور ایونٹ کے شرکاء میوزک کی دھنوں سے محظوظ ہونے کے علاوہ رقص بھی کرتے رہے ۔

ہمنوا لیڈیز کلب کی صدر بلقیس صفدر سمیت دیگر عہدیداروں مدیحہ نعمان، غزالہ اور ہما کا کہنا تھا کہ کوویڈ 19 کے بعد ایسے ایونٹ کی کمی کو محسوس کیا جا رہا تھا جس کو پورا کیا گیا ہے تاکہ پاکستانی کمیونٹی کووڈ کے اثرات سے نکل کر ایک بار پھر سے معمول کی جانب لوٹ سکے۔

 سفارت خانہ پاکستان ویلفیئر سیکشن کے افسران نے بھی ایونٹ کو سراہا اور کہاں کہ ایسے ایونٹس ہوتے رہنے چاہئیے تاکہ پردیس میں رہتے ہوئے اپنے دیس کے رنگوں کو بہتر انداز میں اجاگر کیا جاسکے ۔

ایونٹ کے آخر میں لکی ڈرا کے ذریعے شرکاء کو ڈھیروں انعامات سے بھی نوازا گیا۔