وفاقی وزیر صنعت و پیداوار خسرو بختیار نے کہا ہے کہ پاکستان میں اس سال 34 لاکھ ٹن یوریا کی پیداوار ہوئی ہے۔

وزارت صنعت و پیداوار کی جانب سے جاری کردہ اعلامیہ کے مطابق خسرو بختیار کی زیرِ صدارت یوریا پیداوار و فراہمی پر اہم اجلاس ہوا جس میں وفاقی وزیر برائے فوڈ سیکورٹی فخر امام نے شرکت کی۔

اجلاس میں دسمبر کیلئے یوریا کی پیداوار اور موجودہ اسٹاک پوزیشن پر بریفنگ دی گئی۔

اس موقع پر وفاقی وزیر صنعت و پیداوار خسرو بختیار کا کہنا تھا کہ اس سال ملکی تاریخ میں سب سے زیادہ یوریا کی پیداوار کئی گئی جبکہ پاکستان میں اس سال 34 لاکھ ٹن یوریا کی پیداوار ہوئی۔

ان کا کہنا تھا کہ پاکستان میں یوریا کی فی بوری قمیت 1768 طے کی گئی جبکہ عالمی منڈی میں 10،000 فی بوری یوریا فروخت ہو رہا ہے کچھ عناصر نے یوریا کی بلیک مارکیٹنگ اور ذخیرہ اندوزی سے فائدہ اٹھانے کی کوشش کی، حکومت کی بروقت کارروائی سے ایک ہی ہفتے میں یوریا کی فی بوری قمیت 400 روپے کم ہوئی ہے۔

وفاقی وزیر صنعت و پیداوار خسرو بختیار نے مزید کہا کہ حکومت یوریا کی پیداوار، سپلائی چین اور فروخت کی مسلسل نگرانی کر رہی ہے، کسانوں کو طے شدہ قمیت پر یوریا کی فراہمی کو یقینی بنایا جا رہا ہے۔