سعید غنی نے کہا ہے کہ نام نہاد صحت کارڈ عوام کے ساتھ دھوکا ہے۔

وزیر اطلاعات سندھ سعید غنی نے فواد چوہدری کے بیان پر ردعمل دیتے ہوئے کہا کہ فواد چوہدری کتنے بھی جتن کریں، رہیں گے بونے کے بونے۔

انہوں نے کہا کہ خیبر پختونخواہ اور پنجاب کے لوگ مفت علاج کیلئے سندھ آتے ہیں، نام نہاد صحت کارڈ عوام کے ساتھ دھوکا ہے۔

وزیر اطلاعات سندھ سعید غنی کا مزید کہنا تھا کہ عمران خان پنجاب اور خیبر پختونخوا میں بڑے سرکاری ہسپتال بنانا نہیں چاہتے ، خیبر پختونخوا اور پنجاب کے عوام کو نالائق وزیراعظم کے رحم و کرم پر نہیں چھوڑا جاسکتا۔

اس سے قبل لاہورمیں میڈیا سے گفتگو کے دوران وفاقی وزیراطلاعات فواد چوہدری نے تنقید کرتے ہوئے کہا تھا کہ پیپلزپارٹی اور مسلم لیگ ن قومی سیاست نہیں کرنا چاہتے۔

فواد چوہدری نے کہا تھا کہ سب نے دیکھا اپوزیشن بکھر چکی ہے۔ لوگوں نے کل اپوزیشن کی بکھری ہوئی حالت دیکھ لی تھی۔ اپوزیشن کی لیڈر شپ اتنی مایوس تھی کہ وہ کل اسمبلی کے اجلاس میں نہیں آئے۔

فواد چوہدری کا کہنا تھا کہ عمران خان وزیراعظم نہ ہوتے تو ملک دیوالیہ ہو چکا ہوتا۔ پچھلی حکومتوں کے لیے گئے قرضے ہم واپس کررہے ہیں۔ پاکستان کی معیشت مستحکم ہو رہی ہے۔ ہم نے تین سال میں بتیس ارب ڈالرز کے قرضے واپس کیے۔

ان کا کہنا تھا کہ ہیلتھ کارڈ فلاحی منصوبہ ہے۔ بدقسمتی سے سندھ ہیلتھ کارڈ پراجیکٹ کا حصہ نہیں بنا۔ اپیل ہے وزیراعلی سندھ اپنے فیصلے پر نظرثانی کریں۔ پیپلزپارٹی کی حکومت اپنے شہریوں سے خوفزدہ ہے۔ بلاول بھٹو اورآصف زرداری لاہور آئیں دس مرلے کے گھر میں جلسہ ہو جائے گا۔

وفاقی وزیراطلاعات فواد چوہدری کا کہنا تھا کہ پہلی بارحکومت عوامی مفادات کے لیے کام کررہی ہے۔ پاکستان میں ٹیکس کلچر کو پیدا کرنے کی کوشش کر رہے ہیں۔ منی بجٹ میں صرف درآمدی اشیاء پر ٹیکس عائد کیا گیا ہے۔ امید ہے اگست، ستمبرتک پاکستان کی معاشی حالت بہت بہتر ہو چکی ہوگی۔