وفاقی کابینہ اجلاس میں گیس بحران پر حکومتی ارکان پھر بول پڑے جس کی اندرونی کہانی سامنے آگئی ہے۔

وفاقی کابینہ کے اجلاس میں حکومتی ارکان نے کہا کہ گیس لوڈشیڈنگ ہو رہی ہے ،میڈیا اور عوام ہم سے سوالات کر رہے ہیں۔

ارکان نے کہا کہ کراچی کی انڈسٹری کو بھی گیس نہیں مل رہی، کراچی کے ساتھ یوریا پلانٹس کو بھی گیس نہیں مل رہی۔

ذرائع کے مطابق عبدالرزاق داؤد نے ایکسپورٹ انڈسٹری کے ساتھ معاہدے کی خلاف ورزی پر سوالات اٹھا دیے۔

عبد الرزاق داؤد نے کہا کہ خان صاحب ایکسپورٹ انڈسٹری کو گیس کی سپلائی نہیں ہو گی تو برآمدات متاثر ہوں گی، انڈسٹری کا دعویٰ ہے کہ 35فیصد انڈسٹری بند ہے۔

حماد اظہرنے کہا کہ حکومتی سروے کے مطابق 95 فیصد انڈسٹری چل رہی ہے، ایکسپورٹ انڈسٹری کے کیپٹو پلانٹس کو گیس بند کہ گئی ہے، پراسسنگ یونٹس کو گیس کی سپلائی جاری ہے۔

وزیراعظم نے ایکسپورٹ انڈسٹری اور جنرل انڈسٹری کو گیس کی سپلائی کے حوالے سے نظر ثانی کی ہدایت کرتے ہوئے انڈسٹری کو گیس کی سپلائی پر تین رکنی کمیٹی تشکیل دے دی۔

انڈسٹری کو گیس کی سپلائی پر بننے والی تین رکنی کمیٹی میں شوکت ترین، حماد اظہر اور عبدالرزاق داؤد شامل ہیں۔

ذرائع کے مطابق شوکت ترین کو سینیٹر بننے پر کابینہ ارکان نے مبارکباد تک نہ دی۔

ذرائع کے مطابق اجلاس میں خیبر پختون خوا بلدیاتی انتخابات پر پرویز خٹک کی تعریفیں ہوئیں۔ وزیراعظم عمران خان نے صرف پرویز خٹک کی تعریف کی۔

ذرائع کے مطابق بریفنگ کے دوران عمر ایوب نے لقمہ دیتے ہوئے کہا کہ پھر نہ کہیے گا مہنگائی کی وجہ سے الیکشن ہارے۔

بعد ازاں شبلی فراز کو الیکشن کمشنر سے ملاقات کا ٹاسک سونپ دیا گیا۔