قومی ٹیم کے آف سپنر ساجد خان نے عمران خان کا 44 سالہ پرانا ریکارڈ توڑ دیا ہے۔

تفصیلات کے مطابق  28 سالہ ساجد خان نے بنگلہ دیش کے خلاف ڈھاکہ ٹیسٹ میں 128 رنز کے عوض مجموعی طور پر 12 شکار کیے، یہ کسی بھی پاکستانی باؤلر کی جانب سے ملکی میدانوں سے باہر تیسری بہترین باؤلنگ کاوش تھی۔

 سابق پاکستانی پیسر فضل محمود غیر ملکی میدانوں میں بہترین باؤلنگ فگرز کے لحاظ سے پہلی دونوں پوزیشنز پر قابض ہیں ، فضل محمود نے 1952 میں بھارت کیخلاف لکھنو ٹیسٹ میں 94 رنز کے عوض مجموعی طور پر 12 وکٹیں حاصل کی تھیں جبکہ 1954 میں اوول ٹیسٹ کے دوران 99 رنز دے کر 12 وکٹیں لی تھیں ۔

سابق کپتان عمران خان نے 1977 کے سڈنی ٹیسٹ میں آسٹریلیا کیخلاف 165 رنز دے کر 12 وکٹیں حاصل کی تھیں جب کہ سابق پاکستانی پیسر محمد آصف نے 2006 میں کینڈی ٹیسٹ میں سری لنکا کیخلاف 71 رنز کے عوض 11 شکار کیے تھے۔